ٹوئٹربلیو ٹِک سبسکرپشن سروس کا دوبارہ آغاز کب  ہونے جارہا ہے ؟

سماجی رابطے کی ویب سائٹ  ٹوئٹر کے نئے مالک ایلون مسک  کا کہنا ہے  کہ تصدیق شدہ اکاؤنٹس کے لیے بلیو ٹِک کی سبسکرپشن سروس کا دوبارہ آغاز فی الحال نہیں کیا جا رہا ہے ۔ 

دنیا کے امیر ترین شخصیت ایلون مسک نے  آج ایک ٹویٹ  میں کہا  کہ وہ بلیو ٹِک اس وقت تک دوبارہ نہیں لانچ کریں گے جب تک مکمل اعتماد نہ ہو کہ نقلی اکاؤنٹس کو روکا جا سکے گا۔

ان کا مزید کہنا تھا  کہ اداروں کے تصدیق شدہ اکاؤنٹس کو شخصیات کے اکاؤنٹس کی بہ نسبت مختلف رنگ دیا جائے گا تاکہ دونوں میں فرق واضح ہو۔ 

Holding off relaunch of Blue Verified until there is high confidence of stopping impersonation.

Will probably use different color check for organizations than individuals.

— Elon Musk (@elonmusk) November 22, 2022

یاد رہے کہ  دو ہفتے قبل ٹوئٹر نے بلیو ٹِک حاصل کرنے کے لیے آٹھ ڈالر کا سبسکرپشن پلان عارضی طور پر روک دیا تھا۔

سبسکرپشن پلان متعارف ہونے کے بعد جعلی اکاؤنٹس کی تعداد میں اس قدر اضافہ ہوا کہ ٹوئٹر کو کچھ صارفین کے لیے علیحدہ سے ’آفیشل‘ کا بیج بھی جاری کرنا پڑا تھا۔

اس سے قبل بلیو ٹِک مارک اکاؤنٹس کی تصدیق کے بعد جاری کیا جاتا تھا جو اکثر سیاستدانوں، صحافیوں یا دیگر معروف شخصیات کے تھے ۔  لیکن  سبسکرپشن پلان متعارف ہونے کے بعد ہر اس شخص کو بلیو ٹِک مارک تک رسائی حاصل ہوئی تھی جو آٹھ ڈالر دینے  کو تیار تھا۔

ایلون مسک نے آٹھ ڈالر کا سبسکرپشن پلان کمپنی کی آمدنی میں اضافے کی غرض سے متعارف کروایا تھا۔