فیفاورلڈ کپ : پرتگال کی ٹیم پری کوارٹرفائنل میں پہنچ گئی

قطر میں جاری 22ویں فیفا ورلڈکپ 2022میں پرتگال کی ٹیم گروپ ایچ کے اہم میچ میں یوراگوئے کو 0-2 سے شکست دے کر پری کوارٹر فائنل رائونڈ میں پہنچ گئی۔

یہ پرتگال کی ٹیم کی اپنے گروپ ایچ میں مسلسل دوسری فتح ہے، برونو فرنینڈس نے دو گول سکور کر کے اپنی ٹیم کی فتح میں اہم کردار ادا کیا۔ 

اس سے قبل پرتگال کی ٹیم نے گروپ ایچ میں اپنے پہلے میچ میں گھانا کی ٹیم کو شکست دی تھی۔

لوسیل آئیکونک سٹیڈیم، لوسیل میں کھیلے گئے میگا ایونٹ کے 32 ویں میچ میں گروپ ایچ کی ٹیمیں پرتگال اور یوراگوئے آمنے سامنے تھیں ،جس میں دونوں ٹیموں کے درمیان پہلے ہاف میں بہت سخت مقابلہ ہوا ،دونوں ٹیموں نے گول کی غرض سے ایک دوسرے کے گول پوسٹ پر تابڑتوڑ حملے کئے تاہم کوئی بھی ٹیم گول کرنے میں کامیاب نہ ہوسکی اور پہلا ہاف بغیر کسی گول کے ختم ہوگیا۔

پرتگال کی طرف سے برونو فرنینڈس نے میچ کے 54 ویں منٹ میں ایک گول کر کے اپنی ٹیم کو 0-1 گول کی برتری دلا دی۔ 

میچ کے دوسرے ہاف کے بیشتر وقت میں پرتگال کی ٹیم مخالف ٹیم یوراگوئے پر حاوی رہی ۔ میچ کےآخری لمحات میں 90ویں منٹ میں برونو فرنینڈس نے فاؤل کے نتیجے میں پر ملنے والی پنالٹی کک پر گول کر کے برتری کو بڑھاتے ہوئے مقابلہ 0-2 کر دیا جو کھیل کے آخر تک برقرار رہا۔

یوں پرتگال نے یوراگوئے کو گروپ ایچ کے میچ میں 0-2 گول سے ہرا کر میگا ایونٹ کے پری کوارٹر فائنل کے لئے کوالیفائی کرلیا۔ 

پرتگال کی ٹیم گروپ ایچ میں اپنا تیسرا میچ 2دسمبر کو جنوبی کوریا کے خلاف کھیلے گی۔