فاسٹ باؤلر حارث رؤف انگلینڈ کیخلاف ٹیسٹ سیریز سے باہر

تفصیلات کے مطابق انگلینڈ کے خلاف جاری سیریز میں ریڈ بال فارمیٹ میں ڈیبیو کرنے والے 29 سالہ حارث رئوف راولپنڈی ٹیسٹ کے پہلے روز کھیل کے دوران فیلڈنگ کے دوران گیند پر گرنے کے باعث دائیں ران میں کھچاؤ پیدا ہوا جس کے باعث وہ انگلینڈ کے خلاف ٹیسٹ سیریز کے آئندہ میچز نہیں کھیل سکیں گے۔

پاکستان کرکٹ بورڈ (پی سی بی) نے تصدیق کرتےہوئے کہا ہے کہ راولپنڈی ٹیسٹ میچ کے پہلے روز فیلڈنگ کے دوران گیند کے اوپر گرنے کے بعد فاسٹ باؤلر کا ایم آر آئی کرایا گیا ۔

پی سی بی کے طبی عملے کے اسکینز اور بعد ازاں تشخیص سے یہ نتیجہ اخذ کیا گیا کہ فاسٹ باؤلر کو گریڈ II کے تناؤ کا سامنا ہے۔

حارث اب نیشنل ہائی پرفارمنس سینٹر میں اپنی بحالی شروع کرنے کے لیے لاہور جائیں گے۔

پاکستان کرکٹ بورڈ (پی سی بی) جلد ہی زخمی کھلاڑی کے متبادل کے بارے میں باضابطہ اعلان کرے گا، فہیم اشرف اور محمد نواز جو دونوں ٹیم کا حصہ ہیں ملتان ٹیسٹ کے لیے حارث کا ممکنہ متبادل ہو سکتے ہیں۔

واضح رہے کہ انگلینڈ نے 22 سال بعد پاکستان کو اسی کی سرزمین پرتین ٹیسٹ میچوں کی سیریز کے راولپنڈی میں کھیلے گئے پہلے ٹیسٹ میچ میں پاکستان کو 74 رنز سے شکست دی تھی اور سیریز میں 0-1 کی برتری حاصل کر رکھی ہے ۔

سیریز کا دوسرا ٹیسٹ میچ 9 سے 13 دسمبر تک ملتان میں کھیلا جائے گا جبکہ تیسرا اور آخری میچ کراچی میں 17 سے 21 دسمبر تک شیڈول ہے۔