آئی ایم ایف کو گیس مہنگی اور پیٹرول پر عائد لیوی میں اضافہ کرنے کی یقین دہانی کرائی گئی

تفصیلات کے مطابق وزارت خزانہ کے ذرائع کا کہنا ہے کہ پاکستان اور آئی ایم ایف کے درمیان ورچوئل مذاکرات ہوئے جس میں سیکرٹری خزانہ حامد یعقوب شیخ کی سربراہی میں وفد نے پاکستان کی نمائندگی کی جبکہ آئی ایم ایف کی طرف سے مشن چیف ناتھن پورٹر مذاکرات میں شریک ہوئے۔

ذرائع وزارت خزانہ کا کہنا ہے کہ پاکستانی وفد نے آئی ایم ایف وفد کو معاشی صورتحال کے بارے میں بریفنگ دینے کے ساتھ ساتھ رواں سال کیلئے مقررہ کردہ ٹیکس وصولیوں کا ہدف مکمل کرنے کی یقین دہانی کرائی اور آئی ایم ایف کو سیلاب سے متعلقہ منصوبوں پر آنے والے اخراجات سے آگاہ کیا۔

ذرائع کے مطابق پاکستانی وفد نے گیس کی قیمتوں میں جلد اضافے کے فیصلے سے آگاہ کرتے ہوئے بتایا کہ گیس کی قیمتوں میں اضافہ یکم جولائی 2022 سے ہو گا اور جلد ہی کابینہ اس کی منظوری بھی دیدے گی، گیس کے شعبے کا گردشی قرض بھی ختم کیا جارہا ہے جبکہ پیٹرولیم مصنوعات پر لیوی بھی مرحلہ وار بڑھائی جا رہی ہے۔

ذرائع کے کا کہنا ہے کہ عالمی مالیاتی ادارے (آئی ایم ایف) نے مطالبہ کیا کہ پاکستان روپے کی قدر میں کمی کو مصنوعی طریقے سے نہ روکے جبکہ بجلی پر سبسڈی بھی ختم کی جائے، ٹیکس کا جی ڈی پی تناسب بڑھانے کیلئے اقدامات کئے جائیں اور مختلف شعبوں کو دئیے گئے استثنیٰ بھی ختم کئے جائیں۔