دانیہ شاہ ویڈیو وائرل کیس، عامر لیاقت کی بیٹی کو عدالت میں پیش ہونے کا حکم

کراچی: جوڈیشل مجسٹریٹ شرقی نے عامر لیاقت حسین (مرحوم) کی نازیبا ویڈیوز وائرل کرنے سے متعلق کیس  میں آئندہ سماعت پر مدعی مقدمہ بیٹی دعا عامر کو پیش ہونے کی ہدایت کردی۔

کراچی سٹی کورٹ میں معروف ٹی وی اینکر پرسن عامر لیاقت حسین کی نازیبا ویڈیوز وائرل کرنے سے متعلق مقدمے کی سماعت ہوئی۔ جہاں ملزمہ دانیہ شاہ کو جیل حکام نے عدالت میں پیش کیا۔ ایف آئی اے نے مدعی مقدمہ دعا عامر کا بیان ویڈیو لنک کے ذریعے ریکارڈ کرانے کی درخواست جمع کرادی۔

ایف آئی کے وکیل نے موقفپیش کیا کہ  مدعی مقدمہ لاہور میں زیر تعلیم ہیں، پیش نہیں ہوسکتی ہیں، مدعی مقدمہ کا بیان ویڈیو لنک کے ذریعے ریکارڈ کیا جائے۔

ملزمہ دانیہ شاہ کے وکیل نے ایف آئی اے کی درخواست پر اعتراضات اٹھادیئے۔ لیاقت علی گبول ایڈوکیٹ نے موقف دیا کہ مدعی مقدمہ پاکستان میں موجود ہے ویڈیو لنک کے ذریعے بیان ریکارڈ نہ کیا جائے، مدعی مقدمہ کو عدالت میں پیش ہونے کا حکم دیا جائے، عدالت نے آئندہ سماعت پر مدعی مقدمہ کو پیش ہونے کی ہدایت کرتے ہوئے سماعت 9 فروری تک ملتوی کردی۔