دہشتگردی کی لعنت کو جڑ سے اکھاڑ پھینکیں گے، آرمی چیف

پشاور: چیف آف آرمی سٹاف جنرل سید عاصم منیر نے کہا ہے کہ بحیثیت قوم مل کر دہشتگردی کی لعنت کو جڑ سے اکھاڑ پھینکیں گے۔

انٹر سروسز پبلک ریلیشنز (آئی ایس پی آر) کے مطابق آرمی چیف جنرل سید عاصم منیر نے پشاور پولیس لائن دھماکے کی جگہ کا دورہ کیا آرمی چیف نے پولیس کے جوانوں اور افسروں سے بھی ملاقات کی۔

خیبر پختونخوا پولیس کی بہادری، دہشت گردی کے خلاف جنگ میں کردار کو سراہتے ہوئے سید عاصم منیر نے کہا کہ خیبرپختونخوا پولیس دہشت گردی کے خلاف اگلے محاذ پر لڑنے والی بہادر فورس ہے۔

خیبر پختونخوا پولیس اور قانون نافذ کرنے والے اداروں کے بلند عزم کو بھی سراہا، آرمی چیف نے وطن کے دفاع کیلئے جانوں کا نذرانہ پیش کرنے والے پولیس کے شہدا کو خراج تحسین پیش کیا۔