یوٹیوب کے انڈین نژاد نئے سربراہ نیل موہن کون ہیں؟

خیال رہے سوزین ووچتسکی کے کار گیراج میں برسوں پہلے یوٹیوب کی پیرنٹ کمپنی گوگل کی شروعات ہوئی تھی۔
جمعرات کو سوزین نے اعلان کیا کہ یوٹیوب سے بطور چیف پروڈکٹ آفیسر منسلک نیل موہن اب ویڈیو سٹریمنگ پلیٹ فارم کے نئے باس ہوں گے۔
انڈین نژاد امریکی نیل موہن سٹین فورڈ یونیورسٹی کے گریجویٹ ہیں جنہوں نے سنہ 2008 میں یوٹیوب بحیثیت چیف پروڈکٹ آفیسر جوائن کیا تھا۔ نیل موہن اس سے پہلے آئی ٹی مصنوعات اور سافٹ ویئر بنانے والی کمپنی مائیکروسوفٹ کے لیے بھی کام کر چکے ہیں اور اس کے علاوہ برطانوی تھنک ٹینک کونسل آن فارن ریلیشنز کا بھی حصہ ہیں۔
نیل موہن نے الیکٹریکل انجینیئرنگ میں سٹین فورڈ یونیورسٹی سے پہلے بیچلرز کی ڈگری حاصل کی اور پھر اسی یونیورسٹی کے گریجویٹ سکول آف بزنس سے ایم بی اے کیا۔
تعلیم سے فراغت کے بعد نیل موہن لمبے عرصے تک ڈبل کلک نامی انٹرنیٹ ایڈورٹائزنگ کمپنی کے ساتھ منسلک رہے اور جب گوگل نے 2007 میں اس کمپنی کو خریدا تو نیل موہن بھی گوگل کی ٹیم کا حصہ بن گئے۔
بزنس انسائیڈر کی ایک رپورٹ کے مطابق 2013 میں نیل موہن کو ٹوئٹر میں بطور چیف پروڈکٹ آفیسر کام کرنے کی پیشکش ہوئی تھی لیکن گوگل نے تقریباً 100 ملین ڈالر خرچ کر کے نیل موہن کو رُکنے پر مجبور کر دیا تھا۔
نیل موہن سے قبل انڈیا میں خاندانی جڑیں رکھنے والی کئی شخصیات دنیا کی بڑی ٹیکنالوجی اور آئی ٹی کمپنیوں کے سربراہ کے طور پر کام کر چکی ہیں۔
ان شخصیات میں مائیکروسوفٹ کے سی ای او ستیا نڈیلا، ایڈوبی کے سی ای او شانتانو نارائن اور ایلفابیٹ کے سی ای او سندر پچائی بھی شامل ہیں۔