عمران خان سے پرویز الہٰی کی ملاقات، الیکشن کے التوا کیخلاف احتجاجی تحریک پر مشاورت

چیئرمین تحریک انصاف عمران خان سے سابق وزیراعلیٰ پنجاب پرویز الہٰی نے ملاقات کی، مجموعی سیاسی صورتحال اور الیکشن کے التوا کے خلاف احتجاجی تحریک پر مشاورت کی گئی۔

اس موقع پرعمران خان اور چودھری پرویزالٰہی کی مسلم لیگ ن کی عدلیہ مخالف مہم کی مذمت کی۔ پرویز الہٰی کی پی ٹی آئی میں شمولیت پر بھی تبادلہ خیال ہوا۔

عمران خان کا کہنا تھا کہ نااہل ٹولے نے پہلے ملکی معیشت کو تباہ کیا، اب آئین کو پامال کر رہے ہیں۔ یہ حکمران مزید جتنے دن اقتدار میں رہیں گے ملک کو اتنا ہی زیادہ نقصان ہو گا۔ ملک کو درپیش معاشی بحران سے نکالنے کیلئے الیکشن ناگزیر ہیں۔

پرویز الہٰی نے کہا کہ پی ڈی ایم ٹولہ الیکشن سے بھاگ کر آئین شکنی کا مرتکب ہو رہا ہے۔ الیکشن کمیشن اور گورنرز یاد رکھیں آئین شکنی پر آئین ہی ان کے خلاف راستہ لے گا۔

ادھر عوامی مسلم لیگ کے سربراہ شیخ رشید بھی عمران خان سے ملاقات کیلئے زمان پارک پہنچ گئے۔ ملکی مجموعی سیاسی صورتحال، عام انتخابات کے التواء اور احتجاجی تحریک پر تفصیلی مشاورت ہوگی۔