بہارہ کہو بائی پاس فلائی اوورحادثہ، 2 ہلاک، ایک زخمی

اسلام آباد: ہفتہ کی صبح زیر تعمیر بہارہ کہو بائی پاس فلائی اوور گرنے سے کم از کم دو مزدور ہلاک ہو گئے۔

اسلام آباد کیپٹل ٹیریٹری کے ترجمان نے بتایا کہ ریسکیو ٹیموں نے جائے حادثہ پر پہنچ کر تین مزدوروں کو ملبے سے باہر نکالا، جبکہ دو زخموں کی تاب نہ لاتے ہوئے دم توڑ گئے۔

ریسکیو حکام کے مطابق حادثہ زیر تعمیر پلرکی شٹرنگ گرنے سے پیش آیا، اس پر بھاری تعمیراتی میٹریل ڈالا جا رہا تھا۔

بعد ازاں انسپکٹر جنرل پولیس اسلام آباد ڈاکٹر اکبر ناصر خان، چیئرمین کیپٹل ڈویلپمنٹ اتھارٹی (سی ڈی اے) نور الامین منگل کے ہمراہ اسسٹنٹ کمشنر سیکرٹریٹ انیل سعید اور دیگر حکام نے ریسکیو آپریشن کی نگرانی کے لیے جائے حادثہ کا دورہ کیا۔

دریں اثنا ڈپٹی کمشنر اسلام آباد عرفان نواز میمن کی سربراہی میں ایک کمیٹی بھی تشکیل دی گئی جو واقعے سے متعلق تمام پہلوں کا جائزہ لے گی۔5.6 کلومیٹر طویل بہارہ کہو بائی پاس (بشمول 1 کلومیٹر فلائی اوور)  مری روڈ مالپور سے شروع ہوتا ہے اور مری روڈ پر جوگی بس اسٹاپ کے قریب ختم ہوتا ہے جہاں سے فلائی اوور شروع ہو کر مری کی طرف مقامی بازار کے اختتام تک جاتا ہے۔