شہزادہ فلپ کی آخری رسومات ، ملکہ برطانیہ کا اہم فیصلہ

غیر ملکی میڈیا رپورٹس کے مطابق  برطانیہ کے ونڈرکیسل میں ملکہ برطانیہ کے شوہر ڈیوک آف ایڈنبرا پرنس فلپ کی آخری رسومات کی تیاریاں جاری ہیں۔   شہزادہ ہیری کی وجہ سے ملکہ برطانیہ نے ایک  اہم فیصلہ کیا ہے کہ شاہی گھرانے کے تمام افراد یونیفارم کی روایت کے برخلاف سوگ کا لباس پہنیں گے۔برطانوی  میڈیا کے مطابق ملکہ برطانیہ کا کہنا ہے کہ ایک جیسا لباس پہن کر تمام افراد کے متحد ہونے کا پیغام دیا جائے گا۔ شہزادہ ہیری کے شاہی ذمہ داریوں سے دستبردار ہونے کے بعد ان سے ان کے اعزازی فوجی عہدے واپس لے لیے گئے تھے۔

شہزادہ فلپ کی آخری رسومات اگلے ہفتے ونڈسر کاسٹل کے سینٹ جارج چیپل میں ہوں گی۔ کورونا وائرس کے حفاظتی اقدامات کے پیشِ نظر آخری رسومات میں صرف 30 سوگواران شامل ہوں گے جنہوں نے حفاظتی ماسک پہنے ہوئے ہوں گے۔ اگرچہ شاہی محل نے 30 افراد کی فہرست جاری نہیں کی، تاہم مذکورہ افراد میں شاہی خاندان کے کئی اہم افراد بھی شامل نہیں ہوں گے۔اس موقع پر پوری برطانوی قوم ایک منٹ کی خاموشی اختیا ر کرے گی جبکہ  آخری رسومات کو برطانیہ میں نشر کیا جائے گا۔

یاد رہے کہ ملکہ الزبتھ دوئم کے شوہر ڈیوک آف ایڈنبرا  شہزادہ فلپ  جمعے کے روز 99 سال کی عمر میں انتقال  کر گئے تھے ، شہزادہ فلپ بیماری اور عمر کی زیادتی کے باعث اگست 2017 میں شاہی ذمہ داریوں سے دستبردار ہو گئے تھے اور  انہیں آخری بار جولائی 2020 میں کسی عوامی تقریب میں دیکھا گیا تھا۔ شہزادہ فلپ کی آخری رسومات17 اپریل کو ادا کی جائیں گی۔