وزیراعظم آج سندھ کی ترقی کیلئے446 ارب روپے کے ترقیاتی پیکج کا اعلان کرینگے

تفصیلات کے مطابق وزیراعظم عمران خان آج سکھر اور کراچی کا ایک روزہ دورہ کریں گے، وزیراعظم اسلام آباد سے سکھر پہنچیں گے۔   ائیرپورٹ پر گورنر سندھ عمران اسماعیل سمیت پی ٹی آئی کے رہنما وزیراعظم عمران خان کا استقبال کریں گے۔وزیر اعظم عمران خان ائیرپورٹ سے سکھر جائیں گے اورسکھر میں کامیاب نوجوان احساس پروگرام کا افتتاح کریں گے۔ وزیر اعظم کامیاب نوجوان پروگرام سے متعلق تقریب سے خطاب کریں گے۔وزیراعظم  سکھر میں احساس کفالت پروگرام کا جائزہ لیں گے جس کی تقسیم اس ہفتے شروع کی گئی ہے ،وزیراعظم کفالت ادائیگی مرکز پرصارف خواتین سے ملاقات کریں گے جبکہ وزیراعظم احساس پروگرام کے بائیومیٹرک نظام کا بھی جائزہ لیں گے۔ڈاکٹرثانیہ نشتر وزیراعظم کوسندھ میں احساس کےجاری پروگراموں کی کارکردگی ‏پربریفنگ دیں گی۔

 سکھر میں وزیر اعظم عمران خان پی ٹی آئی کے مقامی اورجی ڈی اے رہنماؤں سے ملاقات بھی کریں گے۔ وزیراعظم دوپہر میں کراچی کے لیے روانہ ہونگے۔ جہاں وہ  شوکت خانم کے فنڈریزنگ افطار ڈنر میں شرکت کریں گے۔ جبکہ گورنر ہاؤس میں مختصر قیام کے بعد اسلام آباد کیلئے روانہ ہوجائیں گے ۔

ترقیاتی پیکج کے  حوالے سے وفاقی وزیر فواد چوہدری نے ایک ٹویٹ میں کہا ہے  کہ یہ پیکج کراچی ٹرانسفارمیشن پلان کے گیارہ سو ارب روپے کے علاوہ ہوگاجس کا گزشتہ سال وزیر اعظم نے اعلان کیا تھا۔انہوں نے کہاکہ آئندہ دو سال سندھ کی ترقی کے سال ہونگے۔فواد چوہدری نے کہاکہ تحریک انصاف کی حکومت سندھ کی عوام کی پسماندگی دور کرنے کیلئے تمام ممکنہ اقدامات اٹھا رہی ہے۔

خیال رہے کہ گزشتہ روزگورنرسندھ عمران اسماعیل نے سماجی رابطے کی ویب سائٹ ٹوئٹر پر جاری اپنے پیغام میں لکھا کہ وزیراعظم کل سندھ کےدورے پرسکھر پہنچیں گے، سندھ کےعوام کاانتظارختم ہونےوالاہے، سندھ کےعوام اپنےمحبوب قائد کا بے انتہا انتظار کررہے تھے، وزیراعظم سندھ کیلئے بڑے ترقیاتی پیکیج کا اعلان کریں گے۔