نوازشریف اور مولانافضل الرحمان کا ٹیلی فونک رابطہ

جی این این کے مطابق پاکستان ڈیموکریٹک موومنٹ (پی ڈی ایم) سربراہ مولانا فضل الرحمان اور نوازشریف میں ٹیلی فونک رابطہ ہوا ہے جس میں ملکی سیاسی صورتحال پر تبادلہ خیال کیا گیا ہے۔ذرائع کے مطابق رابطے کے دوران دونوں رہنماؤں کے درمیان پی ڈی ایم کی آئندہ کی حکمت عملی پر بات چیت کی گئی ہے۔نوازشریف کی جانب سے پیپلز پارٹی اور اے این پی کا معاملہ مولانا فضل الرحمان پر چھوڑ دیا گیا اور کہا گیا  کہ آپ پر پورا اعتماد ہے ، ہم اب بھی پی ڈی ایم کو متحد دیکھنا چاہتے ہیں۔

اس حوالے سے پی ڈی ایم کے سربراہ مولانا فضل الرحمان نے کہا ہے کہ پی ڈی ایم کو متحد رکھنے کیلئے  وہ پیپلز پارٹی کی قیادت سے رابطے میں ہیں۔ مولانا فضل الرحمان  نے کہا  کہ ن لیگ اور پیپلز پارٹی کے رہنماؤں کی طرف سے ایک دوسرے کے خلاف بیان بازی نہیں ہونی چاہیئے، جس پر سابق وزیراعظم نے کہاکہ  شاہد خاقان عباسی اپنے بیان کی وضاحت کرچکے ہیں۔

ٹیلیفونک رابطے میں نوازشریف نے مولانا فضل الرحمن کی صحت کے  بارے  میں بھی دریافت کیا جبکہ دونوں رہنماؤں نے ایک دوسرے کو رمضان کی بھی مبارک باد بھی پیش کی ہے۔

یاد رہے کہ سینیٹ انتخابات کے بعد  پی ڈی ایم  جماعتوں میں اختلافات سامنے آئے تھے ،   سینیٹ میں اپوزیشن لیڈر کے معاملے  پر پی ڈی ایم نے پیپلز پارٹی اور اے این پی کو شوکاز نوٹس جاری کردیے تھے۔ شوکاز نوٹس دینے  پر پی پی پی  نے پی ڈی ایم سے  احتجاجا مستعفی ہونے  کا اعلان کیا تھا ۔

پی ڈی ایم کے سربراہ مولانا فضل الرحمان کا کہنا تھا  کہ پاکستان پیپلز پارٹی اور عوامی نیشنل پارٹی نے پی ڈی ایم کے عہدوں سے استعفی دے کر سیاسی ذہانت کا اظہار نہیں کیا تاہم دونوں پارٹیوں سے کہا گیا ہے کہ وہ اپنے فیصلے پر نظر ثانی کریں۔