آئین کی گولڈن جوبلی کے موقع پر موبائل ایپلی کیشن اور خصوصی یادگاری سکے کا اجراء کر دیا گیا

اسلام آباد: آئین کی گولڈن جوبلی کے موقع پر موبائل ایپلی کیشن اور خصوصی یادگاری سکے کا اجراء کر دیا گیا۔

جمعرا ت کو پارلیمنٹ ہائوس میں منعقدہ ایک تقریب میں سپیکر قومی اسمبلی راجہ پرویز اشرف نے “آئین آف پاکستان” کے حوالے سے موبائل ایپلی کیشن اور خصوصی 50روپے مالیت کے یادگاری سکے کا اجراء کر دیا۔

اس موقع پر تقریب سے خطاب کرتے ہوئے سپیکر نے کہا کہ آئین کی گولڈن جوبلی منانا اہم پیشرفت ہے، ملک 25 سال تک بے آئین رہا، قائد عوام ذوالفقار علی بھٹو کی قیادت میں پارلیمان نے ملک کو 1973 میں متفقہ آئین دیا، آئین پاکستان نے وفاق اور اس کی تمام اکائیوں کو جوڑ کر رکھا ہوا ہے۔

انہوں نے کہا کہ زندہ قومیں اپنے محسنوں کو ہمیشہ یاد رکھتی ہیں، ہم نے آئین پاکستان کے حوالے سے نئی نسل کو پوری آگاہی دینی ہے۔

انہوں نے کہا کہ جن اکابرین نے ملک کو متفقہ آئین دیا ان سب پر ہمیں فخر ہے، ان تمام سیاسی اکابرین نے اپنے اختلافات بالائے طاق رکھ کر متفقہ آئین دیا، آج بھی ہمیں اسی جذبے کی ضرورت ہے، آج بھی ہمیں اپنے تمام سیاسی اختلافات پارلیمان کے فورم پر حل کرنے کی ضرورت ہے۔

راجہ پرویز اشرف نے کہا کہ اختلاف رائے جمہوریت کا حسن ہے، پارلیمان ملک میں تمام اداروں کا سپریم ادارہ ہے ۔ انہوں نے کہا کہ خصوصی ویب سائٹ کے اجراء پر چیئرمین نادرا کا بہت مثبت کردار ہے، چیئرمین نادرا نے ہمیشہ ہماری ہر ہدایت کو احسن طریقے سے نبھایا ہے۔

سپیکر نے کہا کہ آئین کی گولڈن جوبلی کی تقریبات کے کامیاب انعقاد پر قومی اسمبلی سیکرٹریٹ کا کردار بھی قابل تعریف ہے۔