آئین کی پاسداری اور احترام کےلئے تمام اداروں اورپوری قوم کویکسو ہونا پڑے گا، وزیراعظم

اسلام آباد: وزیراعظم محمد شہباز شریف نے کہا ہے کہ آئین کی پاسداری اور احترام کےلئے تمام اداروں اورپوری قوم کو یکسو ہونا پڑے گا، آئین نے پارلیمان کی گود سے جنم لیا۔

عدلیہ آئین کی تشریح کرسکتی ہےلیکن ’’ری رائٹ‘‘ نہیں کرسکتی، دنیا میں کہیں کوئی ایسی مثال نہیں کہ پارلیمان کے قانون، جبکہ ابھی وہ معرض وجود میں بھی نہ آیا ہو،پرعدالت حکم امتناعی جاری کردے، ہم انشاء اللہ اپنے سیاسی اثاثے کو ریاست بچانے کی خاطر قربان کرنے میں ایک لمحے کےلئے بھی نہیں ہچکچائیں گے۔

وہ جمعرات کو یہاں آئین پاکستان 1973کی موبائل ایپ کے اجراء کی تقریب سے خطاب کررہے تھے۔ اس موقع پر وفاقی وزیر اطلاعات ونشریات مریم اورنگزیب، وفاقی وزیرداخلہ رانا ثناء اللہ بھی موجود تھے۔

وزیراعظم شہباز شریف نے کہاکہ آئین کے ڈیجیٹل ایپ پر دستیا ب ہونے سے طلباء و طالبات اور کروڑوں پاکستانی آئین کی منشا اور آئین پاکستان کی بنیادی اساس سے استفادہ کرسکیں گے۔

انہوں نے کہا کہ یہ حسن اتفاق ہے کہ میں 12 اکتوبر1999 کو پی ٹی وی کی اس بلڈنگ سے گزرا جب ایک غیرآئینی قدم اٹھایا گیا تھا اورآج الحمد اللہ آئین کے احترام اور آئین کی شقوں کوہر خاص وعام تک پہنچانے کےلئے دوبارہ اس عمارت میں موجود ہوں۔

اس آئین کے بانیان جن میں سابق وزیراعظم ذوالفقار علی بھٹو، مفتی محمود مرحوم، مولانا شاہ احمد نورانی مرحوم، خان عبدالولی خان جیسی قدآور شخصیات تھیں جو اپنی سیاسی سوچ کے مطابق اپنی جماعتوں کی قیادت کررہے تھے لیکن آئین پاکستان کےلئے انہوں نے اپنے تمام تر اختلافات کو بالائے طاق رکھتے ہوئے اس آئین کو تخلیق کیا اور اس طرح رہتی دنیا تک ان کا نام ہمیشہ سنہرے حروف میں یاد رکھا جائے گا۔

وزیراعظم نے کہا کہ آج پھرآئین کی پاسداری اور احترام کےلئے تمام اداروں اورپوری قوم کویکسو ہونا پڑے گا، آئین نے پارلیمان کی گود سے جنم لیا، آئین کی تشریح عدلیہ کرسکتی ہے یہ اس کا اختیار ہے لیکن عدلیہ آئین کو’’ری رائٹ‘‘ نہیں کرسکتی، یہ صرف اور صرف پارلیمان کا اختیار ہے اور یہ صرف پاکستان میں نہیں بلکہ دنیا بھرمیں اصول مسلمہ ہے ۔