حکومت اورکالعدم تحریک لبیک پاکستان کے درمیان مذاکرات کامیاب

تفصیلات کے مطابق وزیرداخلہ شیخ رشید احمد نے آج  علی الصباح  ٹوئٹر پر ایک ویڈیو بیان جاری کیا جس میں انہوں نے حکومت پاکستان  اور کالعدم  ٹی ایل پی کے درمیان مذاکرات  کی کامیابی کا اعلان کیا۔  وفاقی وزیر داخلہ شیخ رشید احمد  نے اپنے  وڈیو پیغام میں کہا  کہ  حکومت اور تحریک لبیک کے درمیان طویل مذاکرات کے بعد یہ بات طے پا گئی ہے کہ ہم آج قومی اسمبلی میں فرانسیسی سفیرکی ملک بدری کی قرارداد پیش کریں گے ۔جبکہ  تحریک لبیک پاکستان  کی جانب سے مسجد رحمت اللعامین ﷺ سمیت سارےملک سےدھرنےختم کیےجائیں گےاوربات چیت، مذاکرات  کے ذریعے معاملے کو آگے بڑھایا جائے گا۔انہوں نے کہا کہ جن لوگوں  کے خلاف مقدمات درج ہیں سمیت  فورتھ شیڈول، ان کا بھی اخراج کیا جائے گا۔وزیر داخلہ کا کہنا تھا کہ اس پر تفصیلی بیان آج پریس کانفرنس کے ذریعے دوں گا۔

اسلام آباد۔ 20 اپریل

حکومت اور تحریک لبیک پاکستان کے درمیان مذاکرات کامیاب۔

وزارت داخلہ کی جانب سے اہم ویڈیو پیغام جاری.https://t.co/imkNgbg2d0 pic.twitter.com/pHaxAaztSS

— Sheikh Rashid Ahmed (@ShkhRasheed) April 20, 2021

یہ اعلان وزیر مذہبی امور اور وزیر داخلہ شیخ رشید پر مشتمل حکومتی ٹیم کے ٹی ایل پی رہنماؤں کے ساتھ مذاکرات کے تیسرے دورکے بعد کیا گیا ہے۔ قبل ازیں مذاکرات کے دوسرے دور میں گورنر پنجاب چوہدری سرور اور صوبائی وزیر قانون راجا بشارت نے حکومت کی نمائندگی کی تھی۔

یاد رہے کہ وفاقی وزیر داخلہ نے گزشتہ روز  ایک اہم بیان جاری کرتے ہوئے کہا تھا کہ تحریک لبیک پاکستان (ٹی ایل پی) کے ساتھ مذاکرات شروع کر دیے گئے ہیں، جن پولیس اہل کاروں کو ترغمال بنایا گیا تھا انھیں چھوڑ دیا گیا ہے۔ پنجاب حکومت کی پہلی میٹنگ کامیاب ہوئی ہے، دوسرے راؤنڈ میں باقی معاملات بھی طے پا جائیں گے، اللہ سے امید ہے ٹی ایل پی سے معاملات خوش اسلوبی سے طے پا جائیں گے۔

تحریک لبیک پاکستان کے مطالبات: 

تحریک لبیک نے حکومت کے سامنے چار شرائط رکھی تھیں جس میں کہا گیا کہ فرانسیسی صدر ایمانیوئل میخرون کی جانب سے گستاخانہ خاکوں کی حمایت کے بعد فرانسیسی سفیر کو ملک بدر کیا جائے۔ انہوں نے مزید مطالبات کیے کہ پارٹی کے امیر سعد رضوی کو رہا کیا جائے، پارٹی پر پابندی ختم کی جائے اور گرفتار کارکنوں کو رہا کرنے کے ساتھ ساتھ ان کے خلاف درج ایف آئی آر بھی ختم کی جائیں۔

واضح  رہے کہ وزارت داخلہ نے 15 اپریل کو تحریک لبیک پاکستان کو کالعدم قرار دیا تھا ۔