وفاقی حکومت نےاین آئی آر سی کے 8 ارکان کی تقرری کر دی،نوٹیفکیشن جاری

اسلام آباد: وفاقی حکومت نے قومی صنعتی تعلقات کمیشن (این آئی آر سی) کے 8 ارکان کی تقرری کر دی جس کا وزارت اطلاعات و نشریات نے وفاقی کابینہ کی منظوری کی روشنی میں باضابطہ نوٹیفکیشن جاری کر دیا ہے۔

وزارت اطلاعات سے جار ی نوٹیفکیشن کے مطابق 8 شخصیات کا این آئی آر سی کے ارکان کے طور پر تقرر کیاگیا ہے ان میں ریٹائرڈ سول سرونٹ سید نورالحسنین ، ریٹائرڈ ڈسٹرکٹ اینڈ سیشن ججوں عبدالقیوم، سہیل اکرم ،محمد زبیر خان اور شبیر حسین اعوان کو رکن مقرر کیا گیا۔

وکلا سے محمد سراج الاسلام خان، عبدالغنی اور منور حسین طوری بھی این آئی آر سی کے مقرر ہونے والے ارکان میں شامل ہیں۔ کابینہ نے وزارت اطلاعات کی سمری پر ان خالی عہدوں پر تقرریوں کی منظوری دی تھی۔

یاد رہے کہ یہ عہدے 9 ماہ سے خالی تھے ۔ صنعتی تنازعات کے حل کے لئے کمیشن قائم کیا جاتا ہے، یہ کمیشن محنت کشوں کی انجمنوں کی بھی رجسٹریشن کرتا ہے ۔

مزدوروں کے حقوق کے تحفظ اور ان کے حالات کار کی بہتری کے لئے قائم این آئی آر سی وزارت اطلاعات کا ذیلی ادارہ ہے ۔ یہ این آئی آر سی انڈسٹریل ریلیشنز کمیشن (آئی آر اے) کے سیکشن 53 کے تحت قائم کیا جاتا ہے۔ مزدوروں کے عالمی دن کے موقع پر وزیراعظم محمد شہباز شریف کا یہ مزدوروں اور محنت کشوں کے لئے ایک تحفہ ہے۔