جرمنی پاکستان کو 163ملین یورو کے ترقیاتی منصوبوں کیلئے فنڈز فراہم کریگا

برلن: جرمنی پاکستان کو163 ملین یورو کے ترقیاتی منصوبوں کے لیے فنڈز فراہم کر ےگا۔ پاکستان اور جرمنی کے درمیان (جی 2جی) دو روزہ اجلاس برلن میں منعقد ہوا۔

اجلاس میں وفاقی وزیر برائے اقتصادی امور سردار ایاز صادق ،پارلیمانی ریاستی سیکرٹری برائے وفاقی وزارت اقتصادی تعاون اور ترقی (بی ایم زیڈ) جرمنی نیلز اینن، سیکرٹری اقتصادی امور ڈاکٹر کاظم نیاز اور مسٹر ہیلمٹ فشر نے بی ایم زیڈ میں پاکستان اور افغانستان ڈویژن کے سربراہ نے شرکت کی۔

اجلاس کے دوران پاکستان میں جرمن حکومت کی جانب سے 163 ملین یورو کے ترقیاتی منصوبوں کے لیے فنڈز فراہم کرنے پر اتفاق کیا گیا۔ ان منصوبوں میں معیشت کے اہم شعبے اور سماجی و اقتصادی ترقی، یعنی آب و ہوا، سماجی تحفظ، صحت، پانی اور آبپاشی، TVET کے ساتھ ساتھ انسانی ترقی شامل ہیں۔

اینن نے کہا کہ پاکستان اور جرمنی دونوں کے درمیان گزشتہ چھ دہائیوں کے دوران انتہائی مضبوط اور مستحکم ترقیاتی تعاون کی تاریخ پر مبنی خوشگوار تعلقات ہیں۔ انہوں نے اس بات پر زور دیا کہ جرمنی پاکستان کو ترقیاتی تعاون اور باہمی دلچسپی کے دیگر شعبوں کے نقطہ نظر سے ایک اہم سٹریٹجک دو طرفہ شراکت دار کے طور پر دیکھتا ہے۔

انہوں نے یقین دلایا کہ ان کا ملک بی ایم ز یڈ کی جانب سے ترقیاتی مداخلتوں کو پاکستان کی ترقیاتی حکمت عملی، 2030 کے ایجنڈے اور پائیدار ترقی کے اہداف کے ساتھ ہم آہنگ کرنے کے لیے پرعزم ہے۔