عمران خان کو کرپشن کیس میں گرفتار کیا گیا، مریم اورنگزیب

اسلام آباد: وفاقی وزیر اطلاعات و نشریات مریم اورنگزیب نے کہا ہے کہ عمران خان کو کرپشن کیس میں گرفتار کیا گیا، پی ٹی آئی نے عوامی اور ریاستی املاک کو نقصان پہنچایا، یہ عوامی ردعمل نہیں تھا، منصوبہ بندی کے تحت کیا گیا، جو قانون ہاتھ میں لے گا، وہ پاکستانی ہے، نہ پاکستان کا شہری، عوامی و ریاستی املاک کو نقصان پہنچانے والوں کے خلاف سخت کارروائی کی جائے گی۔

بدھ کو اپنے بیان میں وفاقی وزیر اطلاعات نے کہا کہ نیب القادر ٹرسٹ کیس کی تحقیقات کر رہی تھی، عمران خان کو اس کیس میں کم از کم 15 نوٹسز بھیجے گئے، وہ اس کیس میں پیش نہیں ہو رہے تھے۔

انہوں نے اس کیس میں جواب داخل کرنا تھا، عمران خان نیب کو مطلوب تھے۔ وفاقی وزیر اطلاعات نے کہا کہ عمران خان کی گرفتاری کے بعد پی ٹی آئی رہنما اپنے کارکنوں کو جلائوگھیرائو کی ترغیب دیتے رہے، پی ٹی آئی کے کارکنوں نے جو کیا وہ پورے ملک نے دیکھا، کیا یہ عوامی ردعمل تھا؟ یہ منصوبہ بندی کے تحت کیا گیا۔

انہوں نے کہا کہ پی ٹی آئی کے لوگ آج کہتے ہیں کہ کل جو ہوا یہ ہم نے نہیں کیا، یہ کل کیوں نہیں بولے تھے کہ یہ ہمارے لوگ نہیں ہیں۔ وفاقی وزیر اطلاعات نے کہا کہ پی ٹی آئی کے لوگ کل عوامی اور ریاستی املاک کو نقصان پہنچا رہے تھے، ان کے لیڈروں نے انہیں کیوں نہیں روکا، کوئی سیاسی جماعت اس طرح کا ردعمل نہیں دیتی۔

انہوں نے کہا کہ ہمارے لوگ بھی گرفتار ہوئے تھے، نواز شریف، مریم نواز، شہباز شریف، شاہد خاقان عباسی، رانا ثناءاللہ، سعد رفیق سمیت دیگر رہنما بھی گرفتار ہوئے تھے، شہباز شریف کو صاف پانی کیس میں بلایا گیا اور آشیانہ میں گرفتار کیا گیا، ہم نے کبھی اس طرح کا ردعمل نہیں دیا جو پی ٹی آئی نے عمران خان کی گرفتاری پر دیا ہے۔

انہوں نے کہا کہ اس سے قبل جب زمان پارک میں پولیس عمران خان کو گرفتار کرنے گئی تھی تو پولیس والوں پر پٹرول بموں سے حملے کئے گئے۔ انہوں نے کہا کہ پی ٹی آئی جو کر رہی ہے وہ ملک پچھلے کئی سالوں سے دیکھ رہا ہے۔

وفاقی وزیر اطلاعات نے کہا کہ عمران خان کی گرفتاری کے بعد ان کا باقاعدہ میڈیکل چیک اپ کرایا گیا، دیگر ایس او پیز مکمل کئے گئے۔انہوں نے کہا کہ جو قانون ہاتھ میں لے گا، وہ پاکستانی ہے، نہ پاکستان کا شہری، کل سرکاری عمارتوں اور گھروں پر حملے کئے گئے، سرکاری املاک کو نقصان پہنچانے والوں کے خلاف سخت کارروائی کی جائے گی، اس عمل کو برداشت نہیں کیا جائے گا۔\932