پرتگال کے سائیکلسٹ جواؤ المیڈا نے گیرو ڈی اٹالیہ سائیکل ریس کا 16واں مرحلہ اپنے نام کرلیا

روم: پرتگال کے سائیکلسٹ جواؤ المیڈا نے گیرو ڈی اٹالیہ سائیکل ریس کا 16واں مرحلہ جیت لیا۔ اٹلی میں گیرو ڈی اٹالیہ کا 106 واں ایڈیشن جاری ہے جس میں سائیکلنگ کی دنیا کے نامور سائیکل سوار ٹائٹل کے حصول کے لئے کوشاں ہیں۔

گیرو ڈی اٹالیہ سائیکل ریس کے 16ویں مرحلے میں سائیکل سواروں نے سببیو چیز سے مونٹی بونڈون تک کا فیصلہ طے کرنا تھا جو 203 کلو میٹر پہاڑی پر محیط تھا۔24 سالہ پرتگالی سائیکلسٹ جواؤ المیڈا نے عمدہ سائیکلنگ کا مظاہرہ کرتے ہوئے برطانوی سائیکلسٹ گیرینٹ تھامس کو شکست دے کر پہلی پوزیشن حاصل کی۔ 16ویں مرحلہ کے فاتح سائیکلسٹ نے مطلوبہ 203 کلومیٹر کا فاصلہ 5 گھنٹے 53 منٹ اور 27 سیکنڈز میں طے کیا۔

ریس میں برطانوی سائیکلسٹ گیرینٹ تھامس نے دوسری پوزیشن حاصل کی جبکہ سلوانین سائیکل سوار پریموز راگلک نے تیسری پوزیشن حاصل کی۔

گیرو ڈی اٹالیہ ایک گرینڈ ٹور سائیکلنگ سٹیج ریس ہے جو تین ہفتوں میں مکمل ہوگی جس میں دنیا کے نامور سائیکلسٹ شریک ہیں۔ گیرو ڈی اٹالیہ سائیکل ریس 21 مرحلوں پر محیط ہے جس میں سائیکل سوار 3448 کلو میٹر کا سفر طے کریں گے۔

گیرو ڈی اٹالیہ سائیکل ریس میں 22 ٹیمیں ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس 23 روز جاری رہنے کے بعد 28 مئی کو اختتام پذیر ہوگی۔