جسٹس فائز عیسیٰ کیس : بلاول بھٹو کا صدر مملکت سے مستعفی ہونے کامطالبہ

تفصیلات کے مطابق پیپلز پارٹی چیئرمین بلاول بھٹو زرداری نے میڈیا سے گفتگو کرتے ہوئے کہاکہ جسٹس قاضی فائز عیسیٰ کیس کے فیصلے کا خیر مقدم کرتے ہیں ،   جب ریفرنس دائرکیاگیا تھا تو تب بھی ہم نے مذمت کی تھی، ان لوگوں کے خلاف تحقیقات ہونی چاہیئے جنہوں نے معزز جج کوسیاسی انتقام کانشانہ بنایا۔ان کا کہنا تھا کہ  ہم چاہتے ہیں کہ کسی کی کردارکشی نہ ہو۔ بلاول بھٹو کاکہنا تھا کہ وفاقی وزیرقانون اوراحتساب کے مشیر  کابینہ نے صدرکو ریفرنس بھیجاتھا ،ان سب کو بھی مستعفی ہونا چاہیئے ۔

بلاول بھٹو نے این اے 249 میں فتح پر ردعمل دیتے ہوئے کہا کہ  پیپلز پارٹی نے ایک تیر سے کئی شکار کیے ، پیپلز پارٹی سے متعدد بار کامیابی چھینی گئی لیکن کراچی والوں نے سلیکٹڈ حکومت کو مسترد کردیا۔ پاکستان کی سیاست جمہوری قوتوں کی جانب بڑھ رہی ہے۔ کراچی کےعوام نے ہمیں تاریخی کامیابی دلائی اور ثابت کیا کہ وہ حکومت کے ساتھ نہیں ہیں۔

چیئرمین پیپلز پارٹی نے کہا کہ شکست پر ن لیگ کا رد عمل افسوسناک ہے اس کا نقصان ہی ہوگا ،  ڈسکہ الیکشن کی طرح دھند نہیں تھی، ڈسکہ ٹو کا شور مچانے والے بتائیں کہاں ڈسکہ کی طرح فائرنگ ہوئی،   اگرکوئی گڑبڑ ہوئی ہے تو  ثبوت دیں،  پنجاب میں پیپلزپارٹی کے خلاف سازش کی گئی ہم اسٹیبلشمنٹ اوران کی باقیات کامقابلہ کریں گے۔

ان کاکہنا تھا کہ    پی ڈی ایم کی بنیاد جمہوریت اورقانون کی حکمرانی کی بحالی کے لئے رکھی تھی،اگرسلیکٹیڈ وزیراعظم سے جان چھڑانی ہے توروڈ میپ رکھ دیاتھا، ہمارے ایسے سیاسی دوست ہیں جوعمران خان اوربزدارکونہیں ہٹانا چاہتے ہیں۔ انہوں نے کہا کہ بشیرمیمن کوہم عزت کی نگاہ سے دیکھتے ہیں ، بشیرمیمن کواصغر خان کی کیس کی تحقیقات کرنے کے بجائے میرے لانڈری کے  بل کے پیچھے لگادیاگیا، بشیرمیمن کے الزامات پرتحقیقات ہونی چاہیئے۔