کورونا کیسزمیں اضافہ ، لاہور میں ہفتہ واتوار مکمل لاک ڈاؤن ہوگا

تفصیلات کے مطابق کمشنر لاہور کیپٹن (ر) محمد عثمان نے سماجی رابطے کی ویب سائٹ ٹوئٹر پر کیے گئے ایک اعلان میں واضح کیا  ہے کہ  شہر میں ہفتہ اور اتوار کے روز شہر میں تمام کاروباری مراکز اور بازار مکمل طور پر بند رہیں گے۔البتہ صرف اشیائے ضروریہ کی دکانیں اور اہم سہولیات کھلی رہیں گی  جن میں میڈیکل اسٹورز، ویکسینیشن سینٹر، دودھ دہی کی دکانیں ، گوشت، چکن  ، پھلوں سبزیوں کی دکانیں اور پیٹرول پمپس شامل ہیں ۔

کیپٹن (ر) محمد عثمان  نے کہاکہ ہفتہ اور اتوار کو بین الصوبائی ٹرانسپورٹ پر بھی مکمل پابندی ہو گی۔ شہریوں سے گزارش ہے کہ آج اشیاء ضروریہ کی خریداری کرلیں۔

کمشنر لاہور نے عوام سے اپیل کی کہ اس مشکل وقت میں انتظامیہ کے اٹھائے گئے سخت فیصلوں کو کامیاب بنانے کے لیے تعاون کریں،  کورونا وائرس سے روزانہ ریکارڈ تعداد میں قیمتی جانیں ضائع ہو رہی ہیں، اس لیے کورونا وائرس کا پھیلاؤ روک کر قیمتی جانیں بچانے کے لیے مشکل فیصلے کرنا لازم ہے، مشکل کی اس گھڑی میں لیے جانے والے سخت فیصلوں کو کامیاب بنانے میں ہمارا ساتھ دیں۔  یہ مشکل اور کڑا امتحان ہے، کورونا کے خلاف احتیاطی تدابیر اپنائیں، اپنی اور اپنے پیاروں کی زندگیاں محفوظ بنائیں۔ متحد ہو کر کورونا وائرس کو شکست ضرور دیں گے۔  

ہفتہ اور اتوار کو لاہور شہر میں مکمل لاک ڈاؤن ہو گا۔تمام کاروبار اور مارکیٹیں مکمل بند رہیں گی۔صرف میڈیکل سٹور، پٹرول پمپ، ویکسی نیشن سنٹرز، دودھ دہی، گوشت اور سبزی کی دوکانیں کھلی رہیں گی۔

مشکل کی اس گھڑی میں لیے جانے والے سخت فیصلوں کو کامیاب بنانے میں ہمارا ساتھ دیں۔#Lahore pic.twitter.com/FHfLJ8c5cO

— Commissioner Lahore Division (@commissionerlhr) April 30, 2021

دوسری جانب لاہور کے ہسپتالوں میں   96 فی صد تک وینٹی لیٹرز بھی مکمل بھر گئے ہیں ۔پنجاب میں کورونا مریضوں کی تعداد 3لاکھ 01 ہزار 114ہوگئی ۔ جبکہ صوبے میں اب تک 8ہزار 410افراد جان سے ہاتھ دھو بیٹھے ہیں۔ 

واضح رہے کہ  ملک میں گزشتہ 24 گھنٹوں کے دوران وبا سے مزید 131افراد انتقال کر گئے جبکہ5112 نئے کیسز بھی رپورٹ ہوئے ہیں۔ملک میں  اموات کی مجموعی تعداد 17 ہزار811ہوگئی ہے،جبکہ  متاثرہ افراد کی مجموعی تعداد 8 لاکھ 20ہزار 823ہو گئی ہے ۔