بی فاریو گلوبل کمپنی : مبینہ فراڈ کے انکشاف پر مالکان کے نام ای سی ایل میں شامل

سال 2020  میں  عالمی وبا کے باعث پوری دنیاکی معیشت  زوال کاشکار تھی ایسے میں  بی فار یو گلوبل نامی  کمپنی  نے ایک بڑی پیشکش لے کر پاکستانی مارکیٹ میں قدم رکھا ، بی فور یو گلوبل کے مالک   سیف الرحمان خان نیازی    کا کہناتھا کہ  ان کی  کمپنی   اپنے سرمایہ کاروں کو سالانہ ڈھائی گناہ تک منافع دیتی ہے۔کمپنی  پراپرٹی کا کاروبار، آئی ٹی ، آٹو انڈسٹری سے متعلق مختلف کاروبار میں انویسٹ کرکے آپ کومنافع دے گی ۔   یہ منافع یقینی ہوتا ہے چاہے معیشت کتنی ہی تنزلی کا شکار  ہی کیوں نہ رہی ہو ۔ لیکن   مقامی میڈیا کی  ایک رپورٹ میں   حال ہی میں بی فار یو کی  اس  سرمایہ کاری کے نام پر عوام سےکیا گیا   مبینہ فراڈ کا بڑا انکشاف ہوا ہے اور قومی احتساب بیورو (نیب ) کی جانب سے کارروائی عمل میں لائی گئی ۔

مقامی میڈیا کے مطابق عوام سے بڑے پیمانے پر فراڈ کے کیس میں بی فور یو نامی کمپنی کے مالکان کے نام ای سی ایل میں شامل کر لیے گئے ہیں ۔ نیب کی درخواست پر13 اپریل کو سیف الرحمان اور انکے بیٹے احمر کا نام ای سی ایل میں شامل کیا گیا۔  نوٹیفیکیشن کے مطابق ملزمان لوگوں کو غیر قانونی کاروبار میں سرمایہ کاری کی ترغیب دیتے تھے۔ نیب راولپنڈی نے سیف الرحمان و دیگر کے خلاف تحقیقات شروع کر رکھی ہیں جبکہ سیف الرحمان نے اسلام آباد ہائیکورٹ سے20مئی تک  عبوری ضمانت لے رکھی ہے ۔

اس حوالے سے عدالت کی جانب سے  نیب سے جواب بھی  طلب  کیا گیا  جس کے بعد نیب نے تحقیقاتی رپورٹ کی تفصیل  جمع کرادی ہے جس میں  کمپنی کی  سرمایہ کاری کی مکمل تفصیلات شامل کی گئی ہے ۔کمپنی سے متعلق نیب کی   ابتدائی تحقیقا ت  کے مطابق 119ارب روپے تک    کی غیرقانونی سرمایہ کاری سامنے آچکی ہے اورنیب کی جانب سے فراڈ  متاثرین کو  نیب راولپنڈی رابطہ کرنے کا کہا گیا ہے ۔  نیب کا کہنا ہے کہ گزشتہ برس   سرمایہ کاری کے نام پر فراڈ کی نشاندہی ایس ای سی پی نے بھی کی تھی اور لوگوں کو خبردار بھی کیا گیا ۔ پاکستان سپریم کورٹ نے بھی ایسی کمپنیوں کو غیر قانونی قرار دیا ہے جو ایس ای  سی پی سے تصدیق شدہ نہیں ہیں۔

مقامی میڈیا رپورٹ کے مطابق نیب کی جانب سے عدالت میں دائر جواب میں یہ بھی کہا گیا ہے کہ تحقیقات میں متاثرین اور بنک اکاؤنٹس ریکارڈ سامنے آنے کے بعد   اب تک نیب اس نتیجے پر پہنچی ہے کہ جتنی بھی کمپنیاں انہوں نے ظاہر کی  ہیں وہ سب خسارے میں جارہی ہیں اور سٹاف کی تنخواہوں کی مد میں رقم   کو ظاہر کیا جارہا  ہے   اور ان کے پاس سرمایہ  موجود نہیں ۔  نیب کا کہنا ہے کہ خسارے میں جانیوالی کمپینوں   سے کیسے کلیم کیا جا سکتا ہے کہ    اس سے اتنے اربوں روپے کما کر  لوگوں کو واپس لوٹائے جائیں گے ۔ نیب کے مطابق عوام اس سے براہ راست متاثر ہورہے ہیں ، لہذا  ان کی کوشش ہے کہ مبینہ فراڈ سے عوام کو بچایا جائے  اور پہلے  لوگوں کی رقم ان کو واپس  دی جائے ۔ نیب کی جانب سے پلی بارگین کی آپشن بھی موجود ہے تاکہ متاثرین کو طویل  ٹرائل  سے بچایا جاسکے ۔

نیب نے یہ بھی واضح کر دیا ہے  کہ یہ ایک فراڈ  کمپنی ہے اور متاثرین کی   رقم واپس لی جائے  گی ، نیب نے ہائیکورٹ سے مالکان کی  عبوری ضمانت  خارج کرنے   کی بھی  استدعا کی ہے ۔ جبکہ نیب نے ریکوری کی مد میں   سیف اللہ نیازی و دیگر  کے تمام اکاؤنٹس منجمد کر دیے ہیں ۔

مقامی میڈیا کے مطابق ملائیشیا میں بھی اس کمپنی کو فراڈ قرار دیا جاچکاہے اور مبینہ طور پر ملائشیامیں فراڈ کرنے کے بعد سیف اللہ نیازی پاکستان آکر یہ کاروبار شروع کیا ۔  بی فور یوکمپنی کے ساتھ دیگر ذیلی کمپنیوں کے فراڈ بھی سامنے آئے ہیں ۔

بشکریہ  رپورٹ : سماء ٹی وی