ٹوئٹر نے کنگنا رناوت کا اکاؤنٹ معطل کردیا

تفصیلات کے مطابق بالی وڈ اداکارہ کنگنا رناوت اپنے بے باک اور  متنازع بیانات کے لیے خبروں کی زینت بنی رہتی ہیں   لیکن گذشتہ روز ان کے کئی متنازع ٹویٹ سامنے آئے جس کے بعد اب ان کا ٹوئٹر اکاؤنٹ بند کر دیا گیا ہے۔ اداکارہ کی ٹوئٹس کو مختلف جگہوں سے بھی  ہٹا دیا گیا ہے۔ کنگنا کے معطل شدہ اکاؤنٹ پر   جو تحریر درج ہے اس کے مطابق  "ٹوئٹر ایسے اکاؤنٹس کو معطل کر دیتا ہے جو اس کے ضابطوں کی خلاف ورزی کرتے ہیں۔بالخصوص نفرت آمیز پوسٹ یا کسی کو ہراساں کرنے سے متعلق ٹوئٹر کی پالیسی واضح ہے اور اس پر سخت ایکشن لیا جائے گا۔

ٹوئٹر کے ایک ترجمان  کے مطابق   کنگنا کے اکاؤنٹ کو پلیٹ فارم کی  ‘ (Abusive Behaviour Policy) کے تحت معطل کیا گیا ہے جس میں کسی کو دانستہ طور پر ہراساں کرنے یا لوگوں کو اس کے لیے اکسانا شامل ہے۔

حال ہی میں کنگنا نے اپنے سلسلہ وار ٹوئٹس میں انتخابی نتائج کے اعلان کے بعد مغربی بنگال میں ہونے والے مبینہ تشدد پر تبصرہ کیا تھا، جبکہ اس سے قبل بھارت میں مصنوعی آکسیجن کے پلانٹس نصب کرنے کے معاملے پر اداکارہ نے سماجی رابطے کی ویب سائٹ ٹوئٹر پر پیغام دیا جس میں خاصی  ناراضگی کا اظہار کیا تھا ۔

واضح رہے  کہ رواں سال  کے آغاز میں  ایمیزون پرائم ویڈیو سیریز " تانڈو"  کے خلاف اشتعال انگیز ٹویٹ شائع کرنے کے بعد اداکارہ پر پابندی عائد کی گئی تھی  ۔