پاک بحریہ کے سابق سربراہ ایڈمرل کرامت رحمٰن نیازی اسلام آباد میں سپرد خاک

ایڈمرل کرامت رحمٰن نیازی کا پاک بحریہ میں چار دہائیوں پر محیط تاریخی اور شاندار کیریئر تھا۔ انھیں پاکستان کی پہلی آبدوز غازی کے کمانڈنگ آفیسر،پاک بحریہ کے پہلے کمانڈر سب میرین اسکواڈرن اور ڈائریکٹر سب میرین آپریشنز ہونے کا اعزاز بھی حاصل ہے۔ ایڈمرل کرامت رحمٰن نیازی ایک بہادر اور ماہر جنگجو تھے جو  1965 اور 1971 کی  پاک بھارت جنگوں کا حصہ رہے۔ سابق نیول چیف نے 1965 کی جنگ کے دوران دشمن کیلئے خوف کی علامت سمجھے جانے والی آبدوز غازی کی کمانڈ کی اور  آپکی شاندار قیادت میں غازی نے  بھارتی  بیڑے کو  اسکی بندر گاہ میں مقید کردیا۔  اس بحری آپریشن نے نہ صرف دشمن کی صفوں میں خوف پیدا کیا  بلکہ پاکستان کو دفاعی اعتبار سے  بھی نمایاں  سبقت دی۔  سابق امیرالبحر کا پیشہ وارانہ سفر ان کی قائدانہ صلاحیت،اعلٰی کردار، پیشہ وارانہ مہارت اور احساس ذمہ داری کا  عکاس ہے۔

ایڈمرل کرامت رحمٰن نیازی نے 1948 میں رائل پاکستان نیوی میں شمولیت اختیار کی  اور برطانیہ کے رائل نیول کالج سے ابتدائی ٹریننگ حاصل کی۔ وہ نیشنل ڈیفنس کالج پاکستان کے گریجویٹ تھے۔ مارچ  1979 میں آپ پاک بحریہ کے آٹھویں امیرالبحر مقرر کیے گئے۔ اپنے شاندار کیریئر کے دوران آپ متعدد اہم کمانڈ اینڈاسٹاف تعیناتیوں پر فائز رہے جن میں کمانڈر سب میرین، پچیسویں  ڈسٹرائر اسکوڈرن کے کمانڈر، ڈپٹی چیف آف نیول اسٹاف (آپریشنز)، کمانڈر پاکستان فلِیٹ اور وائس چیف آف نیول اسٹاف  شامل ہیں۔

آپ کی اعلی پیشہ وارانہ خدمات اور بہادری کے اعتراف میں آپ کوستارہ جرأت اور  نشان امتیاز (ملٹری) سے نوازا گیا۔

صدر پاکستان، وزیر اعظم، چیئرمین جوائنٹ  چیفس آف اسٹاف کمیٹی، سربراہ پاک بحریہ اور دیگر اعلٰی افسران اور سویلین معززین کی جانب سے ایڈمرل کرامت رحمٰن نیازی کی قبر پر پھولوں کی چادریں بھی چڑھائی گئیں۔