پنجاب میں گزشتہ 24 گھنٹوں کے دوران ڈینگی کے 82 نئے مریض رپورٹ ہوئے، سیکرٹری صحت

لاہور: سیکرٹری صحت پنجاب علی جان خان کا کہنا ہے کہ صوبے میں گزشتہ 24 گھنٹوں کے دوران 82 نئے مریضوں میں ڈینگی وائرس کی تصدیق ہوئی۔ جمعرات کو جاری رپورٹ میں انہوں نے بتایا کہ رواں سال کے دوران پنجاب میں اب تک ڈینگی کے 1709 کنفرم مریض رپورٹ ہو چکے ہیں، جن میں سے 681 کا تعلق صرف لاہور سے ہے۔

علی جان خان کا کہنا ہے کہ لاہور میں گزشتہ روز ڈینگی کے 44 نئے مریض سامنے آ ئے، راولپنڈی میں 20، ملتان میں 5، فیصل آباد میں 4، قصور میں 3، جبکہ گوجرانوالا، ننکانہ صاحب، بہاولپور، چکوال، جھنگ اور چنیوٹ میں ڈینگی کا ایک ایک نیا مریض سامنے آیا۔

ان کا کہنا تھا کہ پنجاب کے ہسپتالوں میں اس وقت ڈینگی کے کل 93 مریض زیر علاج ہیں جن میں سے 4 کی حالت تشویشناک ہے، ضلع لاہور کے ہسپتالوں میں ڈینگی کے 52 مریض زیر علاج ہیں، رواں سال پنجاب میں کوئی شہری ڈینگی کی وجہ سے جاں بحق نہیں ہوا۔