امریکہ پاکستان کی سب سے بڑی برآمدی منڈی ہے،دو طرفہ تجارت 11 بلین ڈالر ہے، مسعود خان

کنیکٹی کٹ: امریکہ میں پاکستان کے سفیر مسعود خان نے کہا ہے کہ پاکستان میں موجود تقریبا 80 امریکی ملٹی نیشنل کمپنیوں کے منافع بخش کاروباری منصوبوں نے یہ ثابت کیا ہے کہ پاکستان ایک فائدہ مند مارکیٹ ہے۔

ان خیالات کا اظہارسفیر پاکستان مسعود خان نے امریکی ریاست کنیکٹی کٹ کی اعلی قیادت جس میں گورنر نیڈ لیمونٹ، لیفٹیننٹ گورنر سوزن بائیسیوچز اور ہارٹ فورڈ کے میئر لیوک برونن شامل تھے سے الگ الگ ملاقاتوں کے دوران کیا۔

مسعود خان نے کہا کہ پاکستان کی مڈل کلاس اور وسطی ایشیا، مغربی ایشیا، مشرق وسطی اور خلیجی خطوں پر مشتمل ملک کا پڑوس کی ایک بہت بڑی منڈی ہے جس نے معاشی اصلاح میں ایک بڑی ڈیمانڈ پیدا کی ہے جسے پورا کرنے کی ضرورت ہے۔

انہوں نے کہا کہ پاکستان میں تجارت اور سرمایہ کاری کی ایک بہت بڑی صلاحیت موجود ہے جسے کاروباری برادری اور عوامی روابط کو فروغ دے کر برے کار لایا جا سکتا ہے ۔

انہوں نے مزید کہا کہ پاکستان اور امریکی ریاست کنیکٹیکٹ کے درمیان موجودہ تعلیمی، ثقافتی اور دیگر روابط اقتصادی میدان میں ہمارے تعلقات کو مزید مستحکم کرنے کے ٹھوس بنیاد فراہم کرتے ہیں۔

مسعود خان نے کہا کہ پاکستان اور کنیکٹیکٹ کے درمیان تجارت اور سرمایہ کاری کا موجودہ حجم اصل صلاحیت سے بہت کم ہے۔ آئی ٹی، ٹیک اسٹارٹ اپس اور فارماسیوٹیکل جیسے شعبوں پر توجہ مرکوز کرکے مختصر سے درمیانی مدت میں اس میں نمایاں اضافہ کیا جاسکتا ہے۔

سفیر پاکستان نے کہا کہ امریکہ پاکستان کی سب سے بڑی برآمدی منڈی ہے دو طرفہ تجارت 11 بلین امریکی ڈالر ہے۔ گذشتہ مالی سال کے دوران پاکستان کی امریکہ کو برآمدات 8.4 بلین ڈالر تک تھیں۔

سفیر پاکستان نے کہا کہ امریکی وینچر کیپٹل کمپنیاں اور یونی کارن کمپنیاں ( ایسی کمپنیاں جن کی مالیت ایک ارب ڈالر یا اس سے زائد ہو) پاکستان میں اسٹارٹ اپس کو مالی معاونت فراہم کر رہی ہیں ۔کنیکٹیکٹ کی کاروباری برادری پاکستان کو سرمایہ کاری کے لیے موزوں پائیں گے۔