نگران حکومت شفاف انتخابی عمل کیلئے تعاون کرے گی،وزیراعظم

اسلام آباد: نگران وزیراعظم انوار الحق کاکڑ نے کہا ہے کہ آئندہ عام انتخابات کی تاریخ کا فیصلہ الیکشن کمیشن کرے گا۔

جسے اس سلسلے میں مکمل اختیار حاصل ہے۔نجی چینل کو دیئے گئے ایک انٹرویو میں وزیراعظم نے کہا کہ پارلیمنٹ نے اس حوالے سے ایک قانون منظور کیا تھا جس کی صدر نے بھی منظوری دی تھی۔وزیراعظم نے کہا کہ نگران حکومت شفاف انتخابی عمل کیلئے تعاون کرے گی۔

نگران حکومت کی مدت کے حوالے سے ایک سوال کے جواب میں انہوں نے کہا کہ کوئی بھی مدت قانون اور آئین کے دائرے کے اندر ہو گی۔توانائی کے شعبے کے مسائل کے بارے میں انوار الحق کاکڑ نے کہا کہ جامع طریقہ کار کے ذریعے تمام مسائل کے حل کیلئے وزیر خزانہ کی سربراہی میں سٹیئرنگ کمیٹی قائم کی گئی ہے۔

انہوں نے کہا کہ صوبائی حکومتوں کو اعتماد میں لیکر انتظامی اقدامات کا پہلے ہی آغاز کر دیا گیا ہے۔ تاہم انہوں نے کہا کہ ان مسائل کے پائیدار حل کیلئے پالیسیوں میں تسلسل اور مناسب طریقہ کار کی ضرورت ہے۔