کورونا وائرس کی بھارتی شکل بنگلہ دیش اور دیگر ملکوں تک پہنچ گئی

تفصیلات کے مطابق  بھارت میں  کورونا وائرس نے تباہی مچائی تو ہسپتالوں میں بستر اور آکسیجن کم پڑ گئی ۔ دو ہفتوں بعد بھی آکسیجن کی سپلائی بہتر نہ ہوئی جس پر بھارتی سپریم کورٹ نے آکسیجن کی سپلائی کی نگرانی کے لیے ٹاسک فورس بنا دی ۔مہاراشٹر ، تامل ناڈو، مدھیہ پردیش،  ہماچل پردیش میں حالات قابو سے باہر ہو گئے  ہیں ۔ مودی نے حالات جاننے کے لیے چاروں ریاستوں کے وزرا اعلیٰ کو فون کئے ۔

کورونا وائرس کی بھارتی شکل بنگلہ دیش اور نیپال سمیت جنوبی ایشیا اور جنوب مشرقی ایشیا میں بھی تباہی مچانے کو ہے ۔ عالمی ادارہ صحت کے مطابق جنوب مشرقی ایشیا میں  ایک ہفتے میں کورونا کے ستائیس لاکھ نئے کیسز سامنے آئے  اور پچیس ہزار اموات ہوئیں۔ اس طرح کورونا کیسز کی  شرح میں انیس فیصد اور اموات میں  اڑتالیس فیصد اضافہ ہوا ۔

سری لنکا میں 13 اور 14 اپریل کو نئے سال کی تقریبات کے اجتماعات  سے ہونے والا نقصان سامنے آنے لگا ۔۔ گزشتہ روز سری لنکا میں 1895 کیسز سامنے آئے  ۔ اس طرح یومیہ کیسز میں پانچ گنا اضافے کا رجحان سامنے آیا ۔  سیاحت پر انحصار کرنے والے مالدیپ کو بھارتی سیاحوں نے دوبارہ کورونا وبا میں دھکیل دیا ۔  کورونا کیسز کی یومیہ تعداد ایک ہزار سے بڑھ گئی ۔

نیپال میں حالات گھمبیر ہونے لگے ۔ ملک میں ہونے والے کورونا ٹیسٹوں میں مثبت کی شرح 44 فیصد تک جا پہنچی ۔ بھارتی وائرس بنگلہ دیش بھی پہنچ گیا ، بنگلہ دیش نے وبا روکنے کے لیے 16 مئی تک لاک ڈاؤن نافذ کر دیا ۔