سروائیکل کینسر سے بچاؤ کیلئے ایچ پی وی ویکسین کی حفاظتی ٹیکہ جات پروگرام میں شامل کرنے کافیصلہ کیا گیا ہے، ڈاکٹر ندیم جان

اسلام آباد: نگران وفاقی وفاقی وزیر برائے قومی صحت ڈاکٹر ندیم جان نے کہا ہے کہ سروائیکل کینسر سے بچاؤ کیلئے ایچ پی وی ویکسین کی حفاظتی ٹیکہ جات پروگرام میں شامل کرنے کافیصلہ کیا گیا ہے، حفاظتی ٹیکہ پروگرام کی کوریج کو سو فیصد یقینی بنانے کیلئے عملی اقدامات کیے جارہے ہیں،یونیورسل ہیلتھ کوریج کو یقینی بنانے کیلئے تمام تر ضروری اقدامات کیے جارہے۔

منگل کو وزارت صحت سے جاری بیان کے مطابق انہوں نے کہا کہ حفاظتی ٹیکہ جات کے پروگرام کی کارکردگی کو بڑھانے کیلئےتین بڑے اقدامات کا فیصلہ کیا گیا ہے۔سروائیکل کینسر سے بچاؤ کے ئلے ایچ پی وی ویکسین کی حفاظتی ٹیکہ جات پروگرام میں شامل کرنے کا فیصلہ کیاگیاہے۔ ایچ پی وی ویکسین کو حفاظتی ٹیکہ جات پروگرام کا حصہ بنانے کیلئے مربوط حکمت عملی تشکیل دے دی ہے۔

پہلے مرحلے میں ہائی رسک ایریاز کے 400 صحت کے مراکز کو شمشی توانائی پر شفٹ کیا جارہاہے،بعد ازاں دوسرے مراکز کو بھی شمسی توانائی پر شفٹ کیا جائے گا۔ انہوں نے کہا کہ قومی الیکٹرانک امیونائزیشن رجسٹری کا آغاز کیا جارہاہےجس سے پروگرام کی کارکردگی کو بہتر بنانے میں مدد ملے گی ۔ ڈاکٹر ندیم جان نے کہا کہ نیشنل الیکٹرانک رجسٹری کے تحت ہر بچے کا امیونایزیشن کا ڈیٹا سسٹم میں درج ہو جائے گا۔ بچوں کے والدین کو الرٹ موصول ہو گا آپ کے بچے کی ویکسی نیشن کی تاریخ کونسی ہے، والدین یہ معلوم کر سکتے ہیں کونسی ویکسین بچے کو لگنی ہے۔

اس سسٹم کے تحت ادارہ اپنے ویکسینیٹر کی حاضری اور کارکردگی کو بھی مانیٹر کر سکتا ہے۔ انہوں نے کہاکہ حفاظتی ٹیکہ پروگرام کی کوریج کو سو فیصد یقینی بنانے کیلئے عملی اقدامات کیے جارہے ہیں۔ حفاظتی ٹیکہ جات پروگرام تیزی سے یونیورسل ہیلتھ کوریج کی جانب گامزن ہے۔یونیورسل ہیلتھ کوریج کو یقینی بنانے کیلئے تمام تر ضروری اقدامات کیے جارہے ہیں ۔ اقدام کا مقصد ملک بھر کے طول وعرض میں کوئی بچہ یا بچی ویکیسنیشن سے محروم نہ رہے۔

انہوں نے کہا کہ وزارت کا قلمدان سنبھالتے ہی ایف ڈی آئی کے سربراہ سے تین میٹنگ کیں، حفاظتی ٹیکہ جات پروگرام کی بہتری کیلئے ان کو اہم ٹاسک دیئے، ایف ڈی آئی کو جو اہداف دیئے ہیں انکو خود مانیٹر کرتا رہوں گا ۔ نگران وفاقی وزیر صحت نے کہا کہ وزارت صحت صوبائی حکومتوں کے ساتھ ملکر کوریج کو یقینی بنانے کیلئے مؤثر اقدامات کو یقینی بنا رہی ہے۔ ملک بھر کے بچوں کو بارہ بیماریوں سے بچانے کیلئے خصوصی توجہ دی جارہی ہے۔