امپورٹڈ گاڑیوں کے ڈیلر کے گھر سے کروڑوں مالیت کی پاکستانی اور غیر ملکی کرنسی برآمد

ایف آئی اے نے حساس اداروں کے ساتھ پی ای سی ایچ سوسائٹی میں مشترکہ آپریشن کرتے ہوئےامپورٹڈ گاڑیوں کے ڈیلر گھر سے پاکستانی اور غیر ملکی بھاری کرنسی برآمد کرلی۔

حکام کے مطابق تاجر عزیز سیکھا کے پی ای سی ایچ ایس میں گھر پر 26 ستمبر کی رات کو چھاپہ مارا گیا.انٹیلی جنس بیسڈ آپریشن میں حساس ادارے کے ساتھ ایف آئی اے اور پولیس نفری بھی شامل تھی. چھاپے کے دوران گھر سے 23 ہزار ڈالر، 2 کروڑ 60 لاکھ روپے سے زائد پاکستانی کرنسی، 5 لاکھ 49 ہزار روپے مالیت کے پرائز بانڈ اور 2 موبائل فون بھی برآمد ہوئے۔

حکام نے بتایا کہ تمام برآمد شدہ رقم اور موبائل فون ایف آئی اے کرائم سرکل منتقل کردیا گیا ہے جب کہ ملزمان کے خلاف ایف آئی اے تھانے میں مقدمہ درج کیا گیا ہے۔عزیز سیکھا امپورٹڈ گاڑیوں کا کاروبار کرتا ہے جس کے گھر کی نگرانی کے بعد کارروائی کی گئی، چھاپہ مار ٹیم کے مطابق نوٹوں کی گڈیاں تکیوں کے غلافوں میں چھپاکر رکھی گئی تھیں۔