نگراں حکومت نے چین، سعودی عرب سے 11 بلین ڈالر قرض مانگ لیا

اسلام آباد: ملک کے معاشی استحکام کی بحالی کے لیے پاکستان کی نگراں وفاقی  حکومت نے چین اور سعودی عرب سے باضابطہ طور پر 11 ارب ڈالر کی امداد کی درخواست کی ہے۔

نگراں وزیر خزانہ ڈاکٹر شمشاد اختر نے یہ  بیان سینیٹ کی قائمہ کمیٹی کے اجلاس کے دوران پیش کیا۔جمعرات کے دن  سینیٹر سلیم مانڈوی والا کی زیر صدارت اجلاس ہوا جس میں مالیاتی اور ریونیو کے معاملات پربات کی گئی۔ ڈاکٹر شمشاد اختر نےبتایا کہ حکومت ٹیکسز کو بڑھانے کے لیے سرگرم عمل ہے۔

اجلاس کے دوران ڈاکٹر شمشاد اختر نے یہ بھی بتایا کہ وفاقی حکومت وفاقی حکومت پر مالی بوجھ کم کرنے کے لیے بینظیر انکم سپورٹ پروگرام کی جزوی طور پر صوبوں کو منتقلی پر غور کر رہی ہے۔

 وزیر خزانہ نے بین الاقوامی مالیاتی فنڈ (آئی ایم ایف) سے قرضوں کی اگلی قسط کو محفوظ بنانے کے لیے ضروری اصلاحات کے نفاذ کے لیے اپنے عزم پر زور دیاپاکستان کو آئی ایم ایف سے 700 ملین ڈالر ملنے کی امید ہے لیکن اس کی مالی ضروریات اس رقم سے کہیں  زیادہ ہیں۔ ڈاکٹر شمشاد اختر نے کمیٹی کو بتایا کہ پاکستان نے سعودی عرب اور چین دونوں سے 11 بلین ڈالرقرض کی  درخواست کی ہے۔

 آئی ایم ایف کے ساتھ موجودہ معاہدے کے تحت پاکستان کو اپنے غیر ملکی زرمبادلہ کے ذخائر کو قریبی مدت میں 9 بلین ڈالر تک بڑھانے کی ضرورت ہے،ڈاکٹر شمشاد اختر کے تحریری بیان میں کہا گیا ہےکہ جون 2024 تک 12 بلین ڈالر تک پہنچنے کا ہدف ہے۔