سب اعتراف کر رہے ہیں کہ حالات خراب ہیں لیکن ذمہ داری کوئی قبول نہیں کر رہا، سراج الحق

امیرجماعت اسلامی پاکستان سراج الحق نے کہا ہے کہ سب اعتراف کر رہے ہیں کہ حالات خراب ہیں لیکن ذمہ داری کوئی قبول نہیں کر رہا، ہمارے تمام ہمسایہ ممالک ترقی کی جانب گامزن ہیں ، ہمارے پاس سب کچھ ہے لیکن ہر طرف سے تباہی کی خبریں آتی ہیں۔

لاہور میں تقریب سے خطاب کرتے ہوئے سراج الحق کا کہنا تھا کہ خبر دیکھی کہ وفاقی حکومت نے پٹرول فی لٹر 8 روپے سستا کر دیا، ساتھ ہی خبر پڑھی کہ گیس کی قیمت میں 20 فیصد اضافہ کر دیا گیا۔

انہوں نے کہا کہ لوگوں کے چہروں سے مسکراہٹیں غائب، خوف و بے یقینی ہے، چاروں طرف تباہی و بربادی ہے، صدر، وزیراعظم سے پولیس تک سب حالات خرابی کا اعتراف کر رہے ہیں، ذمہ داری کوئی بھی قبول کرنے کو تیار نہیں ہے۔

سراج الحق کا کہنا تھا کہ روٹی 25 روپے اور بجلی کا یونٹ 52 روپے کا ہے ، پاکستان میں جیسے ہی کوئی وزیر بنتا ہے اس کی جائیدادوں میں اضافہ ہو جاتا ہے۔ہمارے حکمرانوں نے انگلینڈ اور کینیڈا میں جائیدادیں بنائیں، کبھی سنا پے کہ کینیڈا کے وزیر اعظم کا سعودی عرب میں کاروبار ہے۔

امیر جماعت اسلامی پاکستان نے مزید کہا کہ افغان کرنسی پاکستان سے 3 گنا زیادہ مضبوط ہے، بنگلادیش، نیپال، بھوٹان، سری لنکا، انڈیا سب ترقی یافتہ ہیں، کیا ہماری معیشت ٹھیک اور امن وامان صورتحال بہتر ہو رہی ہے؟