اسرائیل کے ساتھ قیدیوں کے فوری تبادلے کے لیے تیار ہیں،حماس رہنما کا بیان

غزہ کی پٹی میں حماس کے رہنما یحییٰ سنوار نے کہا ہے کہ فلسطینی عسکریت پسند گروپ اسرائیل کے ساتھ قیدیوں کے فوری تبادلے کے لیے تیار ہے۔

غیر ملکی خبر رساں ایجنسی کے مطابق یحییٰ سنوار نے ایک بیان میں کہا ہے کہ ہم قیدیوں کے تبادلے کا ایک فوری معاہدہ کرنے کے لیے تیار ہیں جس میں فلسطینی مزاحمت کے ہاتھوں قید تمام قیدیوں کے بدلے اسرائیلی جیلوں ے تمام فلسطینی قیدیوں کی رہائی شامل ہے۔

اس سے قبل ہفتے کے روز حماس کے مسلح ونگ نے کہا تھا اگر اسرائیل اپنی جیلوں میں قید تمام فلسطینیوں کو رہا کر دے تو وہ ان اسرائیلی یرغمالیوں کو رہا کرنے کے لیے تیار ہے جو 7 اکتوبر کے غیر متوقع حملے کے دوران اغوا کیے گئے۔

عزالدین القسام بریگیڈز کے ترجمان ابو عبیدہ نے حماس کے زیرِانتظام الاقصیٰ ٹی وی چینل کی طرف سے نشر کردہ ایک بیان میں کہا کہ ہمارے ہاتھوں میں دشمن کے یرغمالیوں کی بڑی تعداد کی قیمت (اسرائیلی) جیلوں کو تمام فلسطینی قیدیوں سے خالی کرنا ہے۔ اگر دشمن قیدیوں کی اس فائل کو ایک ہی دفعہ میں بند کرنا چاہتا ہے تو ہم اس کے لیے تیار ہیں۔ اگر یہ مرحلہ وار کرنا چاہتا ہے تو ہم اس کے لیے بھی تیار ہیں۔

اسرائیلی فوج کے مطابق غزہ کی پٹی میں تقریباً 229 یرغمالیوں کو عسکریت پسندوں نے یرغمال بنا رکھا ہے۔

حماس کے زیرِ انتظام غزہ کی وزارتِ صحت کے مطابق غزہ کی پٹی پر اسرائیلی حملوں میں 7,700 سے زیادہ افراد ہلاک ہو چکے ہیں جن میں تقریباً 3,500 بچے بھی شامل ہیں۔