کم عمر بچے کسی صورت گاڑی نہ چلائیں،ڈی ایس پی ٹریفک

ڈی ایس پی ٹریفک ڈیرہ غازیخان امتیاز احمد خان چنگوانی نے کہا ہے کہ والدین اپنے کم عمر بچوں کو ڈرائیونگ نہ کرنے دیں،چھوٹی سی غلطی عمر بھر کی معذوری کا سبب بن سکتی ہے۔

ہفتہ کو جاری بیان میں انہوں نے کہا کہ انسانی جان بہت قیمتی ہے ، کمسن ڈرائیور کی ذرا سی بے احتیاطی اور غلطی کسی کے لیے بھی جان لیوا ثابت ہو سکتی ہے۔انہوں نے کہا کہ سٹی ٹریفک پولیس ڈیرہ غازی خان کے ایجوکیشن یونٹ کی طرف سے بھی عوام کو ایجوکیٹ کیا جا رہا ہے، بغیر لائسنس ڈرائیونگ نہ کی جائے اور دوران ڈرائیونگ ہیلمٹ کا استعمال لازمی کریں۔

انہوں نے کہا کہ شہری ٹریفک قوانین پر سختی سے عمل کریں،اس حوالے سے ٹریفک قوانین کے بارے آگاہی مہم جاری ہے۔

انہوں نے کہا کہ شہر کے مختلف مقامات پر لوگوں کو ٹریفک قوانین کی پاسداری کیلئے لیکچرز دینے کے ساتھ پمفلٹس بھی تقسیم کیے جا رہے ہیں۔

انہوں نے کہا کہ کم عمرڈرائیور  بچوں کے والدین کے خلاف قانونی کاروائی عمل میں لائی جائے گی ۔