حکومت ملک کو ہر بحران سے نکالنے کی صلاحیت رکھتی ہے ،وزیر مذہبی امور

نگران وفاقی وزیر برائے مذہبی امور و بین المذاہب ہم آہنگی انیق احمد نے کہا ہے کہ نگران وفاقی کابینہ ملک کو معاشی بحران سے نکالنے کی صلاحیت رکھتی ہے،کابینہ ملک کو معاشی طور پر مضبوط بنانے کے لیے ہر ممکن کوششیں کر رہی ہے۔

انہوں نے کہا کہ نگران وفاقی حکومت ملک میں غیر ملکی سرمایہ کاری لانے کے لیے کوشاں ہے،مسائل جلد حل ہو جائیں گے۔ انہوں نے کہا کہ تاجر برادری ملکی معیشت میں ریڑھ کی ہڈی کی حیثیت رکھتی ہے۔

انہوں نے امید ظاہر کی کہ آنے والے دن پچھلے دنوں سے بہتر ہوں گے۔وفاقی وزیر نے کہا کہ نگران وفاقی وزیر خزانہ، نجکاری اور دیگر وزرا ملک کی ترقی کے لیے بہتر کام کر رہے ہیں۔

وفاقی وزیر انیق احمد نے کہا کہ اس سال حج پیکج 11 لاکھ 75ہزار روپے سے کم کرکے 10 لاکھ 75 ہزار روپے کر دیا گیا ہے، ملکی تاریخ میں پہلی بار حج پیکج کی رقم میں کمی کی گئی ہے۔انہوں نے کہا کہ وہ عازمین حج کے ہوائی ٹکٹوں میں کمی کے لیے ایئر لائن کمپنیوں سے بھی بات چیت کر رہے ہیں۔ انہوں نے کہا کہ کم ہونے والی رقم حجاج کے اکاؤنٹس میں منتقل کر دی جائے گی۔