معروف کامیڈین طارق ٹیڈی کو مداحوں سے بچھڑے ایک برس بیت گیا

معروف کامیڈین طارق ٹیڈی کی پہلی برسی اتوار کو منائی گئی، انہیں مداحوں سے بچھڑے ایک برس بیت گیا۔

نامور کامیڈین طارق ٹیڈی 12اگست 1976 میں فیصل آباد میں پیدا ہوئے، انہوں نے کم عمری میں ہی اپنے آبائی شہر سے سٹیج اداکاری کا آغاز کیا، طارق ٹیڈی جب لاہور منتقل ہوئے تو ان کے کیریئر کو چار چاند لگ گئے،

انہوں نے متعدد سٹیج ڈراموں میں پرفارم کیا اور خوب داد وصول کی، ان کے مشہور ڈراموں میں چالاک طوطے، ماما پاکستانی، سب کہو بارہ روپیہ، ربا عشق نہ ہووے، حسن میری مجبوری، جی کردا، کریزی، مٹھیاں شرارتاں، خوش آمدید اور دوستی شامل ہیں۔

معروف کامیڈین بڑی سکرین پر بھی جلوہ گر ہوئے اور 2004 میں فلم سلاخیں میں اپنی اداکاری کے جوہر دکھائے۔ وہ کچھ عرصہ جگر کے عارضہ میں مبتلا رہنے کے بعد 19 نومبر 2022ء کو لاہور میں انتقال کر گئے تھے۔