اسلام آباد میں انسدادِ پولیو مہم کل سے شروع ہوگی

اسلام آباد میں انسدادِ پولیو مہم (کل) پیر سے شروع ہوگی جو سات روز تک جاری رہے گی۔

ضلعی انتظامیہ کی جانب سے جاری بیان کے مطابق اسلام آباد میں پانچ سال سے کم عمر چار لاکھ اکیس ہزار بچوں کو پولیو ویکسین پلانے کا ٹارگٹ ہے، جن کو پولیو ٹیم اور ہیلتھ ورکرز گھر گھر جا کر پولیو کے قطرے پلائیں گے ۔پولیو ٹیم اور ہیلتھ ورکرز پبلک مقامات ، بس سٹینڈز اور دیگر جگہوں پر دورہ کر کے بچوں کو پولیو کے قطرے پلائیں گے۔

مہم کے حوالے سےڈپٹی کمشنر اسلام آباد نے افسران کو ہدایت جاری کرتے ہوئے کہا کہ پانچ سال سے کم عمر ہر بچے کو انسدادِ پولیو کی ویکسین پلائی جائے ۔ ڈپٹی کمشنر نے والدین سے گزارش کرتے ہوئے کہا کہ اپنے بچوں کو پولیو کے دو قطرے ضرور پلائیں اور پولیو سے محفوظ پاکستان بنائیں۔

واضح رہے کہ ڈپٹی کمشنر عرفان نواز میمن کی زیرِ صدارت انسدادِ پولیو مہم کے حوالے سے جائزہ اجلاس گزشتہ روز منعقد ہوا۔ اجلاس میں ایڈیشنل ڈپٹی کمشنرز ، اسسٹنٹ کمشنرز ، محکمہ صحت کے نمائندگان اور دیگر اسٹیک ہولڈرز نے شرکت کی۔ اسسٹنٹ کمشنرز اور محکمہ صحت کے نمائندگان نے اجلاس میں انسداد پولیو مہم کے حوالے سے بریفنگ دی۔