ملک بھر میں 5 روزہ انسداد پولیو مہم کا آغاز کر دیا گیا

ملک بھر میں 5 روزہ انسداد پولیو مہم کل پیر سے شروع ہو گی ۔خیبرپختونخوا میں مہم کے دوران پانچ سال تک کی عمر کے 74 لاکھ سے زائد بچوں کو پولیو سے بچائو کے قطرے پلائے جائیں گے۔بچوں کو قطرے پلانے کے لیے 31 ہزار ٹیمیں تشکیل دی گئی ہیں۔اسی طرح بلوچستان میں گھر گھر جا کر ویکسی نیشن مہم کے لیے گیارہ ہزار سے زائد ٹیمیں تشکیل دی گئی ہیں تاکہ پانچ سال تک کی عمر کے 25 لاکھ بچوں کو پولیو سے بچائو کے قطرے پلائے جا سکیں۔

پولیو ایمرجنسی آپریشن سینٹر کے مطابق کوئٹہ، پشین اور قلعہ عبداللہ میں قطرے پلانے کی مہم جمعہ سے جاری ہے۔اسی طرح صوبہ سندھ میں 80 ہزار سے زائد پولیو ورکرز پر مشتمل ٹیمیں گھر گھر جا کر صوبے کے 30 اضلاع میں 5 سال تک کی عمر کے ایک کروڑ سے زائد بچوں کو پولیو سے بچاؤ کے قطرے پلائیں گی۔

 چیف سیکریٹری سندھ نے محکمہ صحت کو تمام ریلوے اسٹیشنوں اور بس ٹرمینلز پر بھی بچوں کو پولیو کے قطرے پلائے جانے کو یقینی بنانے کی ہدایت کی ہے۔پولیو ٹیمیں بس سٹاپوں، ریلوے سٹیشنوں، افغان مہاجرین کیمپوں اور دیگر عوامی مقامات پر بھی موجود ہوں گی تاکہ ہر بچے کو پولیو کے قطرے پلانے کو یقینی بنایا جا سکے۔