عدلیہ کی زیر نگرانی انتخابات کرانے کےلئے پی ٹی آئی کی درخواست

پشاور ہائیکورٹ نے عام انتخابات عدلیہ کی نگرانی میں کروانے کے لئے پی ٹی آئی کی دائر درخواست پر الیکشن کمیشن کو نوٹس جاری کردیا۔

پی ٹی آئی کی جانب درخواست میں استدعا کی گئی ہے کہ عام انتخابات عدلیہ کی نگرانی کرائے جائیں،درخواست پر سماعت جسٹس شکیل احمد اور جسٹس وقار احمد نے کی ، ایڈووکیٹ جنرل اور درخواست گزار وکیل عدالت میں پیش ہوئے ۔

درخواست گزارکے وکیل نے موقف اخیتار کیا ہے کہ ہم عدلیہ کی نگرانی میں انتخابات کرانا چاہتے ہیں ، آرٹیکل 218 (3) کے تحت صاف شفاف وغیر جانبدارالیکشن کرانا لازمی ہیں۔

وکیل درخواست گزار نے کہا کہ گورنر، نگران صوبائی حکومت متنازع ہوچکی ہے ، پی ٹی آئی کو انتخابی مہم کی اجازت نہیں ہے، پارٹی کی مرکزی، صوبائی اور نچلی سطح کی قیادت گرفتارہے اورانہیں مقدمات کا سامنا ہے۔

عدالت نے الیکشن کمیشن کو نوٹس جاری کرتے ہوئے سماعت 18 دسمبر تک ملتوی کردی ۔