تمام متاثرہ ممالک کو موسمیاتی موافقت کی طرف منتقل ہونے کی ضرورت ہے،انوارلحق کا کڑ

نگران وزیراعظم انوارالحق کاکڑ نے متحدہ عرب امارات کے سرمایہ کاروں پر پاکستانی منڈی میں نئے مواقع تلاش کرنے اور معاشی اور تجارتی تعلقات بڑھانے پر زور دیا ہے۔

انٹرنیشنل میڈیا کو انٹرویو دیتے ہوئے   کہا کہ پاکستان میں متحدہ عرب امارات کے سرمایہ کاروں کیلئے سرمایہ کاری کے لاتعداد مواقع موجود ہیں۔

وزیراعظم نے کہا کہ دونوں ملکوں کو زراعت، توانائی، کان کنی، انفارمیشن ٹیکنالوجی، لاجسٹک اور دفاع کے شعبوں میں تعاون کو مزید بڑھانا چاہئے۔

وزیراعظم نے کہا کہ پاکستان متحدہ عرب امارات سمیت اہم ممالک میں سرمایہ کاری کے فروغ کی جامع پالیسی کی منصوبہ بندی کر رہا ہے۔ انہوں نے کہا کہ دبئی میں خصوصی سرمایہ کاری سہولت کونسل کے زیر اہتمام پاکستان انویسٹمنٹ روڈ شو سے بین الاقوامی تاجروں اور سرمایہ کاروں کی بڑی تعداد راغب ہوئی ہے۔

موسمیاتی تبدیلی کے چیلنج کے بارے میں انہوں نے کہا کہ تمام متاثرہ ممالک کو موسمیاتی موافقت کی طرف منتقل ہونے کی ضرورت ہے۔

انہوں نے کہا کہ موسمیاتی اقدامات کیلئے یہ عشرہ فیصلہ کن ہے اور فوری طور پر کوئی اقدام نہ کرنے سے انتہائی بڑے پیمانے پر تباہی ہو سکتی ہے۔

انہوں نے کہا کہ ہمیں ایک لائحہ عمل اختیار کرنے کی ضرورت ہے جو کہ تیزی سے توانائی کی منتقلی اور موسمیاتی مالیاتی اہداف کے بارے میں معاہدے پر مبنی ہونا چاہئے۔

انہوں نے کہا کہ ترقی پذیر ممالک کو موسمیاتی موافقت، محفوظ تعمیرات اور نقصانات کے ادارے پر توجہ مرکوز کرنے کیلئے 2030 تک 24کھرب ڈالر سالانہ کی ضرورت ہے۔