ملک کی اعلیٰ عسکری قیادت کا میجر محمد اکرم شہید، نشان حیدر کو ان کی 52ویں شہادت کی برسی پر شاندار خراج عقیدت

راولپنڈی: ملک کی اعلیٰ عسکری قیادت نے میجر محمد اکرم شہید، نشان حیدر کو ان کی 52ویں شہادت کی برسی پر شاندار خراج عقیدت پیش کرتے ہوئےکہا ہے کہ آئیے ان ہیروز کو یاد رکھیں جنہوں نے مادر وطن کے دفاع میں اپنی جانوں کا نذرانہ پیش کیا، قوم کو اپنے بہادر بیٹوں پر فخر ہے۔

آئی ایس پی آر کے مطابق چیئرمین جوائنٹ چیفس آف سٹاف کمیٹی جنرل ساحر شمشاداور تینوں افواج کے سربراہان نے میجر محمد اکرم شہید، نشان حیدر کو ان کی 52ویں شہادت کی برسی پر شاندار خراج عقیدت پیش کیا۔ ان کا کہنا تھا کہ تمام مشکلات کے باوجود بہادری کا مظاہرہ کرتے ہوئے میجر محمد اکرم شہید نے 1971 کی جنگ کے دوران لڑائی میں دشمن کے ان گنت حملوں کو بہادری سے پسپا کیا۔

میجر اکرم کی اس بے مثال مزاحمت نے ہندوستانی فوج کو اس وقت تک مادر وطن کے ایک انچ بھی آگے نہیں بڑھنے دیا جب تک وہ شہید نہیں ہوئے۔ ایسی مثالی جرات ہمارے مادر وطن کے محافظوں کی پہچان ہے۔ عسکری قیادت نے کہا کہ میجر محمد اکرم کا یوم شہادت مادر وطن کے دفاع کے لیے افواج پاکستان کی جانب سے دی گئی غیر معمولی قربانیوں کی یاد دہانی کے طور پر کام کرتا ہے۔