بھارتی ٹیم رواں ماہ جنوبی افریقہ کا دورہ کرے گی

نئی دہلی: بورڈ آف کنٹرول فار کرکٹ ان انڈیا (بی سی سی آئی ) کے مطابق بھارتی مینز کرکٹ ٹیم رواں ماہ جنوبی افریقا کا دورہ کرے گی ۔ بھارتی ٹیم اپنے دورہ جنوبی افریقا کے دوران میزبان ٹیم کے خلاف تین ٹی ٹونٹی ،تین ون ڈے اور دوٹیسٹ میچوں کی سیریز کھیلے گی۔

دونوں ٹیموں کے درمیان تین ٹی ٹونٹی بین الاقوامی میچوں پر مشتمل سیریز کا پہلا میچ 10 دسمبر کو ڈربن میں کھیلا جائے گا۔ دوسرا ٹی ٹونٹی میچ 12 دسمبر کو سینٹ جارج پارک ، کبیخا میں کھیلا جائے گا جبکہ تیسرا اور آخری 14 دسمبر کو نیو وانڈررز سٹیڈیم، جوہانسبرگ میں کھیلا جائے گا۔

ٹی ٹونٹی سیریز میں بھارتی ٹیم کو سوریہ کمار یادو لیڈ کریں گے۔تین ایک روزہ بین الاقوامی میچوں پر مشتمل سیریز کا آغاز 17 دسمبر کو جوہانسبرگ کے مقام پر شیڈول پہلے میچ سے ہوگا، دوسرا ون ڈے میچ 19 دسمبر کو سینٹ جارج پارک، کبیخا میں کھیلا جائے گاجبکہ تیسرا اور آخری ون ڈے میچ 21 دسمبر کو بولینڈ پارک، پرل کے مقام پر کھیلا جائے گا۔

ون ڈے سیریز میں بھارتی ٹیم کو لوکیش راہول لیڈ کریں گے جس کے مکمل ہونے کے بعد دونوں ٹیموں کے درمیان دو ٹیسٹ میچوں کی سیریز کا پہلا میچ 26 سے 30 دسمبر تک سنچورین میں کھیلا جائےگا جبکہ دوسرا اور آخری ٹیسٹ میچ 3 جنوری سے 7 جنوری 2024 تک کیپ ٹائون میں کھیلا جائے گا۔ ٹیسٹ سیریز میں بھارتی ٹیم کو مایہ ناز بلے باز روہت شرما لیڈ کریں گے۔