انوارلحق کاکڑ کی زیر صدارت اسلام آباد میں انسداد پولیو ٹاسک فورس کا اجلاس

نگران وزیراعظم انوارالحق کاکڑ نے متعلقہ حکام کو ہدایت کی ہے کہ آئندہ سال ملک سے پولیو کے خاتمے کیلئے جامع ہنگامی منصوبہ وضع کیاجائے ۔آج اسلام آباد میں انسداد پولیو ٹاسک فورس کے اجلاس کی صدارت کرتے ہوئے انہوں نے پولیو وائرس کے انتہائی خطرے والے علاقوں میں ہنگامی بنیادوں پر مربوط پروگرام تیار کرنے کی ہدایات بھی دیں۔

وزیراعظم نے پولیو سے بچائو کے قطرے پلانے کے نظام کی نگرانی کو بہتر بنانے کیلئے جدید ٹیکنالوجی کے استعمال کی ضرورت پر بھی زوردیا ۔

انوارالحق کاکڑ نے وزارت صحت کو ہدایت کی کہ بہترین عالمی تجربات کے تحت لائحہ عمل وضع کرنے کیلئے کمیٹی تشکیل دی جائے۔

ملک میں حال ہی میں سامنے آنے والے پولیو کے حالیہ مریضوں پر وزیراعظم نے کہاکہ یہ معاملہ باعث تشویش ہے کہ پولیو وائرس اب بھی پاکستان میں موجود ہے۔

انہوں نے کہاکہ دانشوروں ، اساتذہ اوروالدین سمیت تمام متعلقہ فریقوں کو انسداد پولیو کی آگاہی مہم کا حصہ بناناچاہیے۔انہوں نے انسداد پولیو مہم میں دانشوروں کے اہم کردار کواجاگر کرنے کیلئے کنونشن منعقد کرنے پر بھی زوردیا ۔وزیراعظم نے متعلقہ حکام کو ہدایت کی کہ انسداد پولیو مہم کے دوران پولیو ورکرز کی جامع سیکورٹی یقینی بنائی جائے۔اجلاس کو بتایاگیا کہ ڈیرہ اسماعیل خان، بنوں ، لکی مروت اورٹانک کے انتہائی خطرے والے علاقوں میں انسداد پولیو کے خصوصی صحت کیمپ قائم کئے گئے ہیں ، اجلاس کو یہ بھی بتایاگیا کہ حالیہ انسداد پولیو مہم میں اب تک چار کروڑ چالیس لاکھ بچوں کو پولیو سے بچائو کے قطرے پلائے جاچکے ہیں۔