آن لائن لرننگ ڈرائیونگ لائسنس ایپ کا باضابطہ آغاز

لاہور: پنجاب خاص طور پر لاہور میں ڈرائیونگ لائسنس بنوانے کے رش میں دن بدن اضافہ ہوتا جا رہا ہے اور اس میں آسانی کے لیے ایک معاون ایپ اور آن لائن لرنر لائسنس بنوانے کی سہولت فراہم کی جارہی ہے۔

لاہور ٹریفک پولیس کے ترجمان رانا عارف نے انڈپینڈنٹ اردو سے بات کرتے ہوئے بتایا  ’ہر روز پنجاب بھر میں کم سے کم  10 ہزار ریگولر ڈرائیونگ لائسنس کا اجرا کیا جا رہا ہے باقی اس کے علاوہ ہیں۔‘ 

یہی وجہ ہے کہ پولیس خدمت مراکز میں نہ صرف لائسنس بنوانے والوں کا رش لگ چکا ہے بلکہ اس قدر کام میں اضافے کے سبب خدمت مراکز کے کمپیوٹر سسٹم ڈاؤن ہونے کی شکایات بھی سامنے آرہی ہیں جس کی وجہ سے عوام کو کئی کئی گھنٹوں اپنی باری کا انتظار کرنا پڑتا ہے۔ 

اسی کو مدنظر رکھتے ہوئے نگران وزیر اعلیٰ پنجاب محسن نقوی نے ہفتے کو یہ ہدایات جاری کیں تھیں کہ جنہیں لائسنس کا ٹوکن مل چکا ہے ان کا تین روز تک چالان نہ کیا جائے۔