حماس کی جنگی صلاحیتوں کو مکمل تباہ کرنے تک بمباری جاری رہے گی، اسرائیلی کی دھمکی

غیر ملکی خبر رساں ادارے کے مطابق    جنگ بندی کے لیے بڑھتے ہوئے عالمی دباؤ کے  باوجود اسرائیلی بمباری جاری ہے اور  حماس کے بھی جوابی راکٹ حملے جاری ہیں ۔

اسرائیلی  قیادت نے دھمکی دی ہے کہ  حماس اور اسلامک جہاد کی جنگی صلاحیتوں کو مکمل تباہ کئے جانے تک بمباری جاری رہے گی۔

 اسرائیلی وزیر جنگ بینی گانتز نے کہا ہے کہ  جب تک مکمل اور طویل مدت کے لئے خاموشی نہیں ہوجاتی لڑائی بند نہیں کی جائے گی۔ غزہ میں اسرائیلی بمباری اور گولی باری سے شہید فلسطینیوں کی تعداد 213 ہوگئی، 61 بچے شامل ہیں ۔

 حماس کے راکٹ حملوں سے مزید دو اسرائیلی شہری ہلاک، اسرائیل میں ہلاکتوں کی تعداد 12 ہو گئی ہے۔

اقوام متحدہ امدادی ایجنسی کے مطابق  اسرائیل کی بمباری سے غزہ میں 52 ہزار سے زیادہ فلسطینی بے گھر ہوگئے،اسرائیلی بمباری سے کم از کم 450 رہائشی عمارتوں کو شدید نقصان پہنچا ہے،اسرائیلی بمباری سے 136 عمارتیں زمین بوس،316 رہائش کے قابل نہیں رہیں۔اسرائیلی بمباری سے چھ ہسپتالوں اور  نو بنیادی صحت مراکز کی عمارتوں کو بھی شدید نقصان پہنچا۔

ایمنسٹی انٹرنیشنل  کا کہنا ہے کہ  رہائشی عمارتوں پر اسرائیلی بمباری جنگی جرم ہے،اسرائیلی فورسزنے بمباری کرتے ہوئے رہائشی عمارتوں اور شہریوں کی زندگیوں کی پروا نہیں کی۔غزہ کے 47 ہزار بے گھر فلسطینی اقوام متحدہ کے  زیرانتظام چلنے والے 58 سکولوں میں پناہ لینے پر مجبور ہیں ۔

عالمی ادارہ صحت کا کہنا ہے کہ  غزہ میں طبی سامان کی شدید کمی، آلودہ پانی سے بیماریوں اور بے گھروں کو کورونا کا خطرہ ہے۔