پی ٹی آئی کے صدر کا تین قومی اور تین صوبائی اسمبلی کے حلقوں سے الیکشن لڑنے کا اعلان

سابق وزیراعلیٰ پنجاب چودھری پرویز الہٰی نےکہا ہے کہ اگر الیکشن شفاف نہ ہونے دیئے گئے تو ملک کے اندر جو ہنگامہ ہو گا لوگ ساری تاریخ بھول جائیں گے پی ٹی آئی کے صدر نے تین قومی اور تین صوبائی اسمبلی کے حلقوں سے الیکشن لڑنے کا اعلان کردیا۔

عدالت پیشی کے موقع پر میڈیا سے غیر رسمی گفتگو کرتے ہوئے چودھری پرویز الہٰی کا کہنا تھا کہ تین قومی اور تین صوبائی اسمبلی حلقوں سے الیکشن میں حصہ لے رہا ہوں۔ لیول پلیئنگ فیلڈ پر انہوں نے کہا کہ فیلڈ ہی کوئی نہیں لیول کیا ہونا ہے، صحافی نے پوچھا کیا پارٹی چیئرمین پر آپ کو کوئی اعتراض ہے؟ جس پر چودھری پرویز الہٰی نے کہا کہ وہ بلامقابلہ منتخب ہوئے ہیں۔

“الیکشن شفاف نہ ہونے دیئے گئے تو ملک کے اندر جو ہنگامہ ہو گا لوگ ساری تاریخ بھول جائیں گے” - صدر پاکستان تحریک انصاف چوہدری پرویز الہی

pic.twitter.com/SOoq7qkpjh

— PTI (@PTIofficial) December 21, 2023

تحریک انصاف کے مرکزی صدر کا کہنا تھا کہ اگر کسی نے منصفانہ اور غیر جانبدارانہ الیکشن نہ ہونے دیا تو ملک کو نقصان ہو گا، ایسا نقصان ہو گا کہ لوگ ساری تحریک کو بھول جائیں گے، انتخابات ہونے دیں، اچھی سوچ اور کام کی بنیاد رکھیں۔

انہوں نے کہا کہ ملک سے دونوں لاڈلوں نواز اور شہباز نے جو کیا ہے غریبوں کو کھانے کو کچھ نہیں مل رہا، ابھی کل دوبارہ گیس کی قیمت بھی بڑھی ہے بجلی کی قیمتوں میں بھی اضافہ ہوا ہے، مجھے دو مرتبہ اٹیک ہوا ہے مگر ہسپتال نہیں جانے دے رہے، یہ کونسا جنگل کا قانون ہے۔