تاریخی والٹن ائیرپورٹ کی منتقلی، حتمی تیاریاں شروع

تفصیلات کے مطابق  تاریخی والٹن ائیرپورٹ کی منتقلی کیلئے سول ایوی ایشن اتھارٹی نےحتمی تیاریاں شروع کردیں ہیں ۔والٹن ائیرپورٹ کو شہر سےدور مرید کےمیں منتقل کیا جارہا ہے۔

سول ایوی ایشن (سی اے اے ) کے مطابق  نئے ائیرپورٹ پر والٹن ائیرپورٹ کےفلائنگ کلبز کو منتقل کیا جائے گا، فلائنگ کلبز میں سٹوڈنٹ پائلٹس کوجہازاڑانے کی تربیت دی جاتی ہے۔

سول ایوی ایشن اتھارٹی نےائیرپورٹ کی تعمیر کا ٹینڈرجاری کردیا ہے،ٹینڈر کے مطابق نئے ائیرپورٹ کودو مراحل میں تعمیر کیا جائےگا ، پہلے مرحلے میں ائیرپورٹ کا بنیادی انفراسٹرکچر تعمیر کیا جائےگا ، دوسرے مرحلے میں ائیرپورٹ ٹرمینل،ائیر ٹریفک کنٹرول ٹاوراور ہینگرز تعمیر ہوں  گے۔سول ایوی ایشن اتھارٹی نے ائیرپورٹ کی تعمیر کیلئے سات جون تک پیش کش طلب کرلیں۔

واضح رہے کہ  پنجاب حکومت تاریخی والٹن ائیرپورٹ کو مسمار کرکےبزنس ڈسٹرکٹ قائم کرنے کا اعلان کرچکی ہے، والٹن ائیرپورٹ کو مسمار کرنے کیلئے فلائنگ کلبز اپنا احتجاج ریکارڈ کرا چکی ہیں، تاریخی والٹن ائیرپورٹ پرقائد اعظم سمیت اہم شخصیات کےطیارےاتر چکے ہیں۔