عام انتخابات کیلئے تمام انتظامات مکمل ہیں ، الیکشن کمیشن

الیکشن کمیشن نے جمعرات کو ہونے والے عام انتخابات کیلئے تمام انتظامات مکمل کرلئے ہیں۔

بارہ کروڑ سے زائد رجسٹرڈ رائے دہندگان قومی اسمبلی اور چاروں صوبائی اسمبلیوں کیلئے ووٹ ڈالیں گے۔

الیکشن کمیشن نے چاروں صوبوں میں نوے ہزار چھ سو پچھتر پولنگ اسٹیشن قائم کئے ہیں ۔

ان میں سے اکتالیس ہزار چار سو پولنگ اسٹیشن مشترکہ جبکہ پچیس ہزار تین سو بیس مرد وں اور تئیس ہزار نو سو باون خواتین رائے دہندگان کے لئے قائم کئے گئے ہیں۔

قومی اسمبلی کی نشستوں کے کل پانچ ہزار ایک سو اکیس امیدوار میدان میں ہیں۔

ان میں چار ہزار آٹھ سو سات مرد تین سو بارہ خواتین اور دو خواجہ سرا شامل ہیں ، انتخابات قومی اسمبلی کی دو سو چھیاسٹھ اور چاروں صوبائی اسمبلیوں کی پانچ سو ترانوے عام نشستوں پر ہوں گے ۔