بلوچستان کے مختلف علاقوں میں زلزلے کے جھٹکے

بلوچستان : لورالائی اور اس کے ملحقہ علاقوں میں اتوار کو زلزلہ کے جھٹکے محسوس کئے گئے۔ ریکٹر اسکیل پر جس کی شدت 4.2 ریکارڈ کی گئی۔ نجی نیوز چینل کی رپورٹ کے مطابق نیشنل سیسمک مانیٹرنگ سینٹر (این ایس ایم سی) نے تصدیق کی ہے کہ لورالائی اور ملحقہ علاقوں میں زلزلے کے جھٹکے محسوس کیے گئے ہیں۔ لورالائی کے کسی بھی حصے سے ابھی تک کسی جانی یا مالی نقصان کی اطلاع نہیں ملی ہے۔ لوگ خوف کے مارے کلمہ طیبہ کا ورد کرتے ہوئے گھروں سے باہر نکل آئے۔ 

این ایس ایم سی اسلام آباد کے مطابق زلزلے کا مرکز لورالائی سے 11 کلومیٹر جنوب مغرب میں تھا۔لورالائی میں زلزلے سے قبل بلوچستان کے ضلع ژوب میں 3.6 شدت کا زلزلہ آیا۔

این ایس ایم سی نے بتایا کہ زلزلے کا مرکز ژوب سے 123 کلومیٹر شمال میں تھا، جس کی گہرائی 15 کلومیٹر تھی۔ابھی تک لورالائی یا ژوب میں کسی جانی یا مالی نقصان کی کوئی اطلاع نہیں ہے۔