مجھے نا اہل کرنے والے خود استعفے دے رہے ہیں، نواز شریف

قائد مسلم لیگ ن میاں نوازشریف ن کہا ہے کہ مجھے ساری زندگی کیلئے نا اہل قرار دینے والے آج خود استعفے دے رہے ہیں، جو اگلا چیف جسٹس بننے والا تھا وہ بھی استعفیٰ دے کر گھر چلا گیا، دال میں کچھ کالا ہے اور چور کی داڑھی میں تنکا ہے۔ جب  سب کچھ سستا تھا تو مجھے کیوں نکالا۔

مری میں جلسے سے خطاب کرتے ہوئے قائد مسلم لیگ ن میاں نوازشریف نے کہا کہ میں کل مری پہنچا تو راستے میں بڑی ٹریفک تھی، سب سے پہلے ملک کی خوبصورت ترین میٹل روڈ بنی تو وہ راولپنڈی سے مری کی بنی۔ افسوس ہے، میرےجانے کے بعد اس ملک کو کیا ہوگیا، میں عوام کی خدمت کر رہا تھا۔

انہوں نے کہا کہ میں نے ملک سے لوڈشیڈنگ ختم کی، بجلی سستی کی، میرے دور میں ٹریکٹر 8لاکھ کا تھا آج 38 لاکھ کا ہے، نوازشریف کا زمانہ اچھا تھا یہ اب والا اچھا ہے۔ مجھے نکال دیا گیا اور میری جگہ اس کو لائے جس نے ایک کروڑ نوکریاں دینے کا وعدہ کیا، کیا نوکری ملی، ہاتھ کھڑا کرو، وہ کٹے بچے کہاں گئے؟ وہ مرغیاں، وہ انڈے کہاں چلے گئے۔

ان کا کہنا تھا کہ مری میں ہسپتال بھی بننا چاہیے، دانش سکول، یونیورسٹی کیمپس بھی ہونا چاہیے، ہم یہاں پر ایک موٹروے بھی بنائیں گے، مری کے چاروں طرف موٹروے آئے گی۔ کندھے سے کندھا ملا کرن لیگ دوبارہ اس ملک کو بنائے گی،  آج یوم کشمیر ہے، ہم اپنے مظلوم کشمیری بھائیوں کے ساتھ کھڑے ہیں، اور ہمیشہ کھڑے رہیں گے۔